O Banco de Terras de Galicia abre o prazo para alugar máis de 6.000 fincas a prezos regulados

O Banco de Terras de Galicia vén de abrir un novo prazo para arrendar parcelas.  Esta ferramenta que está en marcha dende 2007 conta nestes momentos con arredor de 19.000 fincas en depósito, das que máis de 5.000 están xa alugadas.  Carlos Díaz, xefe de área de Mobilidade de Terras da Consellería do Medio Rural, explica en Cope Galicia que desta volta vanse incorporar ao aluguer máis de 6.500 parcelas, que suman un total de 2.000 hectáreas en toda a comunidade galega. A oferta distribúese por todo o territorio, cunha maior concentración de fincas nas provincias da Coruña e Ourense, con máis de 2.000 parcelas en cada unha.

Unha oportunidade para o sector primario

Esta iniciativa está dirixida fundamentalmente a "agricultores e gandeiros que necesiten terra para ampliar a súa explotación ou para incorporarse á actividade", segundo explica Díaz. O arrendamento debe ser sempre pola parcela enteira e por anos completos. A duración mínima do contrato é de cinco anos, aínda que pode estenderse ata os 30 anos para fins agrícolas ou gandeiros e ata os 70 para usos forestais.

Prezos fóra da especulación

Unha das claves do Banco de Terras é que os prezos están regulados e non os fixa o propietario, co obxectivo de evitar movementos especulativos. "Non se volva prezo con un valor especulativo, que se os prezos de referencia son 100 euros que non me van pedir nin 1.000 nin 3.000 euros por aluguer", sinala o responsable da consellería. Os prezos varían segundo a parroquia e o uso destinado ao terreo.

Por exemplo, no concello de Abegondo (A Coruña), os prezos por hectárea e ano son de 170 euros para cultivos leñosos, 150 euros para labradío, 69 euros para pastos e 100 euros para uso forestal. Estes valores son similares noutros concellos, sempre axustados ao tipo de aproveitamento. O arrendatario pode ofertar un prezo igual ou superior ao de referencia, nunca inferior.

Garantías e proceso de solicitude

O procedemento de solicitude pódese realizar de forma telemática a través da sede electrónica da Xunta de Galicia, utilizando o código MR711B. Para quen non dispoña de medios electrónicos, o trámite pode facerse presencialmente. O proceso completo, se non hai atrancos, adoita durar entre seis e nove meses.

O propietario vai cobrar a renda e vai recuperar a finca, polo menos, nas mesmas condicións nas que a entregou"

Carlos Díaz Redondo

Xefe da Área de Mobilidade de Terras de Medio Rural

O sistema ofrece unha dobre garantía para os propietarios que incorporan as súas fincas ao banco. Carlos Díaz asegura que "o propietario vai cobrar a renda e vai recuperar a finca, polo menos, nas mesmas condicións nas que a entregou". Deste xeito, garántese tanto o cobro da renda como o bo estado da parcela ao rematar o contrato.

Nestes momentos, un terzo das parcelas que están en depósito do Banco de Terras de Galicia son de propietarios particulares mentres as restantes proceden de procesos de concentración parcelaria desenvolvidos ao longo dos últimos anos.