María Manuela: "O feminismo non é ir contra os homes, é que participen e nos apoien"

Ferrol recoñece a unha das voces imprescindibles da cultura galega. A cantante e pintora María Manuela será homenaxeada co galardón ‘8 de marzo’ na súa décimo oitava edición, un premio  que o Concello de Ferrol lle entregará este domingo 8 de marzo, ás 18 horas,  no Teatro Jofre.

A propia artista confesa sentirse "moi feliz" e afirma que é "un orgullo grande" e unha "honra" recibir este recoñecemento. O galardón non só pon en valor a súa traxectoria artística, senón tamén unha vida marcada polo compromiso coa cultura galega, a educación, a comunidade e a igualdade.

Un compromiso innato coa igualdade

Preguntada por se foi consciente de que o seu traballo era unha contribución á igualdade, María Manuela teno claro: "Sempre o sentín, é algo que vai comigo". A artista explica que nunca se parou a pensar nas repercusións do seu activismo, simplemente actuaba porque "lle nacía" de dentro.

Cantar en galego contra vento e marea

María Manuela pertence a unha xeración de mulleres que abriron camiño nun contexto onde cantar en galego non sempre foi doado. Lembra como nos seus inicios lle dicían que "era mellor cantar en castelán" porque tería máis fama, pero para ela sempre foi "un compromiso" coa súa lingua e a súa cultura.

Aínda que comezou a gravar en 1974 cun selo discográfico que vía o galego como unha moda, ela e o seu compañeiro Miguel rexeitaron continuar por ese camiño. A súa intención era clara: querían facer cancións que levasen sempre "unha carga política e social".

Feminismo é que os homes participen

A cantante defínese como feminista e explica o seu punto de vista. Para ela, o feminismo non consiste en ir contra os homes, senón en que "os homes participen" e "se saiba que están ao lado das mulleres", permitindo que estas poidan traballar e desenvolverse en igualdade.

Considera que aínda queda moito camiño por percorrer en materia de igualdade e fai un chamamento a acudir á manifestación do 8 de marzo. "As mulleres non podemos perder o pouquiño que se foi acadando", sentenza.

Sobre o seu legado, a María Manuela gustaríalle ser lembrada sinxelamente como "unha boa muller". No acto de homenaxe, ademais de recibir o galardón, a artista subirá de novo ao escenario para cantar unhas cantas pezas, nun evento con invitacións de balde para todo o público que desexe asistir. As entradas son de balde.