Luma Gómez, unha vida adicada as artes escénicas

O teatro galego recoñece a unha das súas grandes figuras na trixésima edición dos Premios María Casares. A Asociación de Actores e Actrices de Galicia outorga o seu Premio de Honra Marisa Soto á actriz ferrolá Luma Gómez, en recoñecemento a "toda unha vida dedicada ás artes e o compromiso co sector". A propia actriz manifestou que "é un premio que che dan os teus compañeiros, e iso sempre resulta gratificante".

Unha vida dedicada ao teatro

Gómez iniciou a súa carreira no Teatro Estudio de Ferrol, o xerme da súa vocación. Tras unha etapa en Madrid, onde participou do movemento do teatro independente, volveu a Galicia para ser unha peza clave na creación do teatro profesional galego, participando na fundación do Centro Dramático Galego e de compañías como Teatro do Noroeste.

A loita polo sector

A intérprete tamén destacou polo seu activismo e compromiso co sector, o feminismo e os dereitos laborais. "Sempre fun moi partidaria de asociarnos, de reivindicar en conxunto", declarou, poñendo en valor a forza do colectivo. Para Gómez, "Sempre é máis forte unha asociación que un individuo".

A pesar dos avances, a actriz considera que "aínda falta moito camiño por andar" e sinala os retos pendentes. "Falta moita estabilidade para os actores e directores", asegura, á vez que pide un maior "impulso económico, pero tamén de políticas teatrais e audiovisuais" para unha industria que, no caso do audiovisual, percibe "un pouco de capa caída".

Este recoñecemento chega nun momento de plena actividade para a actriz, que se atopa de xira por Galicia co espectáculo 'Guerra'. Luma Gómez, que evitou elixir un só papel favorito entre os moitos que interpretou, segue a demostrar a súa paixón polos escenarios.