O BNG pide á TVG que retransmita os partidos do Río Breogán en ACB

De cara á vindeira tempada 2025-2026, e coa certeza de que o Río Breogán será o único equipo galego na Liga ACB, o Bloque Nacionalista Galego vén de pedir formalmente á CRTVG que retransmita os partidos que o equipo dispute no Pazo Provincial dos Deportes de Lugo.

Olaia Rodil subliña que sería a única vía para que milleiros de afeccionados galegos poidan seguir os encontros dun equipo histórico coma o Breogán, sobre todo para quen non pode permitirse pagar plataformas privadas ou non dispón de carné de socio nin entradas, que adoitan esgotarse con rapidez.

Un esforzo xusto e posible

Rodil recoñece que a retransmisión destes partidos supón un importante desembolso económico, debido aos elevados custos que implican os dereitos audiovisuais neste nivel de competición. Con todo, lembra que noutras comunidades autónomas, como Cataluña ou Canarias, xa se teñen acadado acordos para emitir partidos da ACB a través das súas canles públicas, polo que entende que “se hai vontade, hai maneira”.

A deputada anunciou que o seu grupo parlamentar levará esta proposta ao Parlamento galego, xa que consideran que “é unha cuestión de xustiza co baloncesto galego e cun club histórico como o Breogán”, ao tempo que sería un recoñecemento ao labor que o equipo está a facer levando o nome de Lugo e de Galicia por toda España.

“Ademais —lembra Rodil—, a TVG xa retransmitiu partidos do Breogán no seu momento, polo que existen precedentes e capacidade técnica”. 

O apoio da Deputación de Lugo

00:00

Volumen

Cerrar

Chema Núñez

Olaia Rodil e Efrén Castro pedindo televisión galega para Lugo e o Breogán

Efrén Castro, vicepresidente da Deputación de Lugo, sumouse á petición e denunciou que “a Lugo e ao Breogán trátasenos como de segunda” e que a canle pública galega “debería estar á altura dun equipo que é o buque insignia do baloncesto galego”.

Castro insistiu en que esta reivindicación non só ten sentido deportivo, senón tamén simbólico e social: “A presenza do Breogán na ACB é unha oportunidade para visibilizar Lugo e Galicia en todo o Estado”.

Exemplo doutras canles autonómicas

O BNG sinala como exemplos a seguir os casos de TV3, que ten previsto emitir ata 14 partidos do Joventut de Badalona, ou as televisións públicas canaria e vasca, que tamén están a negociar cos titulares dos dereitos de emisión para dar visibilidade aos seus equipos.

“O feito de que outras canles autonómicas o consigan demostra que existe marxe de negociación”, afirmou Rodil.

Contra o monopolio das retransmisións

A deputada tamén alertou do "práctico monopolio" que exercen actualmente grandes plataformas privadas sobre os dereitos de emisión, dificultando o acceso das televisións públicas autonómicas. Porén, considera que isto non debe ser unha escusa para non tentar chegar a acordos, especialmente cando se trata dun contido que ten un forte interese público e social en Galicia.