A novela ‘A illa que supuraba sangue’ de Carmen V. Valiña gaña o XIX Premio de Narrativa Breve Repsol

A obra A illa que supuraba sangue, da escritora e historiadora Carmen V. Valiña, resultou gañadora da XIX edición do Premio Narrativa Breve Repsol. O galardón, impulsado pola Fundación Repsol e a Xunta de Galicia, está dotado con 12.000 euros e inclúe a publicación do libro pola Editorial Galaxia. O anuncio tivo lugar en Vigo, no marco do 75º aniversario da editorial.

Unha viaxe á posguerra

O xurado destacou da novela a súa "habelencia para nos mergullar nun xogo de espellos temporais que nos traslada aos difíciles días da inmediata posguerra e, doutra parte, sitúanos nun presente convulso coa simbólica illa de San Simón como escenario". Segundo o fallo, a obra está escrita cunha prosa de fino burilado e tinturas líricas e ábrese á intriga cun misterio que conduce a "un final que, de seguro, lle resultará a quen lea tan sorprendente coma desacougante".

Un final que, de seguro, lle resultará a quen lea tan sorprendente coma desacougante"

Acta do xurado do premio Narrativa Breve de Repsol 

Sobre a autora

Carmen V. Valiña (Baio, 1985) é doutora en Historia Contemporánea e profesora na Universidade Europea Miguel de Cervantes. Combina a investigación sobre a memoria das mulleres anónimas dos séculos XIX e XX cunha notable faceta como escritora de ficción na que destacan as lembranzas, o mundo rural e a autobiografía.

Nos últimos anos especializouse nas historias das mulleres internas do psiquiátrico de Conxo, traballo do que nace o seu ensaio As tolas que non o eran. En 2024 participou na Residencia Literaria da Illa de San Simón e foi seleccionada para a V Residencia Literaria da Cidade da Cultura.

Case vinte anos de historia

O Premio Narrativa Breve foi creado en 2006 para fomentar a cultura e a lingua galega. Desde 2010, a Fundación Repsol impulsa o certame, que conta coa colaboración da Real Academia Galega, a Asociación de Escritoras en Lingua Galega e a Editorial Galaxia, que publica as obras gañadoras. Nesta XIX edición presentáronse un total de 43 obras orixinais e inéditas.