Drons e helicópteros "convivindo" no aire e supervisados dende Lugo

O alcalde de Lugo, Miguel Fernández, anunciou este mércores a incorporación da empresa Vig-Sec Drone ao fondo de investimento público-privado Lugo Transforma, de xeito que xa son once as empresas participadas polo Concello de Lugo, cun investimento que xa supera os 3,4 millóns. 

A empresa, fundada no ano 2019 na Lama, na provincia de Pontevedra, está especializada en actividades de consultoría e formación en aviación con drons, ademais de desenvolver Suite ACRE, un software de xestión do espazo aéreo en situacións de emerxencia que permite a coordinación simultánea de drons e helicópteros. 

O rexedor local estivo acompañado por Rubén e Noelia Gil, responsables da empresa, así como por Jorge Leiro, analista de investimentos de Torsa Capital, entidade xestora do fondo.

"Importancia estratéxica"

Miguel Fernández destacou a "importancia estratéxica" desta incorporación para o tecido produtivo da cidade.

"Este é o tipo de proxectos que queremos atraer co Lugo Transforma: empresas que innovan, que xeran emprego e que teñen un impacto na sociedade", explicou.

"Vig-Sec Drone prevé crear 30 empregos directos na nosa cidade antes de 2029, axudando a que Lugo creza con proxectos sólidos e de futuro", precisou. 

CON SEDE EN LUGO E CON FUTURO PARA XENTE DE LUGO

A empresa xa se atopa instalada na Rúa do Pombal, nas inmediacións do Pazo de Feiras e Congresos.

Actualmente conta cun equipo formado por 15 persoas e quere duplicar a plantilla nos vindeiros anos, para o que xa está colaborando co CIFP As Mercedes na incorporación de futuros egresados do centro.

O investimento por parte do fondo Lugo Transforma é de 300.000 euros, para permitir á empresa ampliar os seus equipos operativos e técnicos.