A Coruña contará cun parque infantil cuberto: esta é a súa ubicación

A Xunta de Goberno Local da Coruña aprobou este mércores a saída a concurso de dúas intervencións valoradas en máis de 1,6 millóns de euros, que permitirán avanzar co Plan de Barrios 2025-27, tanto no Ventorrillo como en Elviña

A alcaldesa, Inés Rey, presidiu  a sesión ordinaria da Xunta de Goberno Local, a derradeira deste mes de xullo, e na que se deu luz verde a un investimento de 1,6 millóns de euros no Ventorrillo e Elviña, reforzando así a folla de ruta do novo Plan de Barrios 2025-2027 que promove o Goberno municipal. Tal e como expuxo antonte a rexedora, na presentación oficial do Plan, iranse atendendo as demandas de cada distrito, con énfase na mellora dos espazos públicos, accesibilidade universal e renovación de infraestruturas de ocio.

Primeiro parque infantil cuberto da Coruña

É o caso do parque infantil lindeiro á gardaría do Ventorrillo, que o Concello ampliará e mellorará nos vindeiros meses, co que dará resposta a unha das principais demandas das familias usuarias da instalación. “Destinamos un millón de euros a renovar este espazo. Era unha actuación que tiñamos sobre a mesa xa desde hai tempo, e, agora, entramos na última fase dos trámites administrativos previos á execución das obras”, indicou Rey. A saída a concurso dos traballos abre camiño á remodelación do parque, que contará cunha novidade destacada: será a primeira área infantil cuberta da cidade, para protexer as crianzas en días de mal tempo e fronte á radiación solar.

A previsión do Concello é que a área infantil do Ventorrillo conte con catro cubertas lixeiras de policarbonato. A superficie pasará de 400 a 730 metros cadrados, e as persoas usuarias de 76 a 135. Ademais, renovaranse o pavimento, os equipamentos, e sumaranse xogos inclusivos e sensoriais. Haberá dous novos tobogáns aproveitando o noiro lindeiro ao parque. O prazo de execución das obras será de nove meses desde a adxudicación.

O anteproxecto previo á licitación de San Diego e O Castrillón, aprobado

Por outra banda, hoxe aprobouse o informe de viabilidade das concesións dos centros deportivos de San Diego e do Castrillón, que o Concello ten previsto sacar a concurso proximamente. Neste sentido, a Xunta de Goberno deu luz verde ao anteproxecto das obras e melloras previstas a futuro. Establécese un investimento mínimo de 6.500.000,00 € para renovalas, cun modelo de financiamento sustentado nos ingresos pola súa explotación.

A meirande parte dos investimentos serán en San Diego, cun recinto que leva 25 anos en funcionamento e necesita renovación nos sistemas de auga quente e fría, ventilación e climatización, fontanería e filtración de piscinas. Tamén haberá melloras de accesibilidade e actuacións na envolvente. No Castrillón, o investimento será menor xa que o centro é máis recente.

650.000 euros para humanizar a praza Manuel Guitián, en Elviña

Ademais, a Xunta de Goberno Local deu luz verde ao proxecto e licitación das obras para humanizar a praza Manuel Guitián, situada en Elviña. Ao igual que en Pintor Laxeiro e Pintor Manuel Colmeiro, mellorarase a contorna dos bloques residenciais, gañando superficie peonil e seguridade viaria, especialmente nun distrito cunha alta porcentaxe de poboación maior de 65 anos.

Renovaranse os pavimentos das beirarrúas e da calzada, visibilizaranse os espazos de estacionamento, elevarase o paso peonil, plantaranse árbores e instalarase mobiliario urbano. Tamén se renovará a iluminación e farase separativa a rede de pluviais e saneamento. O investimento será de máis de 650.000 euros, con prazo de execución de seis meses.

Pulo ao emprendemento no centro de empresas de Agrela

Hoxe tamén se aprobou a modificación inicial da Ordenanza reguladora dos centros municipais de empresas de Agrela e O Papagaio. “Vimos dándolle facilidades ao tecido emprendedor para usar estas instalacións nas primeiras fases de desenvolvemento”, afirmou Inés Rey. No Papagaio, contabilizáronse seis novas iniciativas no primeiro semestre do ano.

A modificación permitirá incorporar unha nova tarifa para proxectos en preincubación no centro de Agrela, como xa acontece no Papagaio. A medida busca apoiar novas iniciativas empresariais para que atopen lanzadeira de futuro na cidade. Tras a aprobación inicial, levarase ao Pleno para a súa ratificación.

Aproveitamento dun antigo baixo de ADIF en Catro Camiños

No ámbito da Concellaría de Urbanismo, Rehabilitación e Vivenda, fíxose balance das licenzas e permisos urbanísticos concedidos na última quincena. Entre os expedientes, destaca o que permitirá reconverter o baixo da antiga cervexaría entre Alcalde Marchesi e a avenida de Oza, propiedade que foi do ADIF.

Tras a súa poxa recente, o local será remodelado para acoller un novo ximnasio no barrio de Catro Camiños.