A Plataforma na Defensa da Sanidade Pública da Mariña que aglutina entidades sociais, de doentes, organizacións políticas e sindicais fixo un chamamento aos alcaldes da Mariña a sumarse á demanda dunha área de Xestión Integrada comarcal, dotacións orzamentarias para a ampliación do Hospital da Costa e unha defensa inequívoca da sanidade pública porque este non é momento de seguir disciplinas partidistas senón de sumar esforzos e defender intereses comúns para evitar un maior deterioro da sanidade pública na comarca.  Segundo explicaron o Partido Popular e a Consellaría de Sanidade non poden seguir enganando á comarca con falsas ampliacións do Hospital da Costa nin con interpretacións interesadas dun Decreto de Xestión Integrada de ámbito provincial do que xa coñecemos os seus efectos na Coruña, Ourense e Pontevedra e que para a Mariña suporía a perda de servizos e facultativos na así como o fin das posibilidades de ampliación do Hospital Comarcal e o deterioro dos servizos sanitarios públicos no seu conxunto. Piden posicionamentos claros e firmes dos alcaldes da comarca para sumar esforzos na defensa da sanidade pública na comarca A Plataforma pide aos alcaldes da comarca, ao marxe da súa filiación política, un apoio claro que poña en evidencia a necesidade da urxente ampliación do Hospital da Costa, a marcha atrás nas intencións da Consellaría de Sanidade para aplicar en Lugo o Decreto de Xestión Integrada de ámbito provincial. Para a Plataforma aquí non caben desculpas porque “quen cala outorga” e este non é o momento de “agardar a ver que pasa”, “xa son moitas as evidencias sobre as intencións da Consellaría e tamén as voces que comparten o despropósito desta medida polo que os alcaldes non poden ficar mais tempo calados”. É evidente, afirmaron, “que a aplicación dun Decreto de Xestión Integrada de ámbito provincial terá efectos demoledores na calidade asistencial xa deteriorada polos brutais recortes orzamentarios, a perda da autonomía comarcal, a modificación do mapa sanitario na provincia e a dependencia dun xestor provincial non fará mais que empeorar a situación” O Partido Popular e a Consellaría de Sanidade non pode seguir enganando á comarca con ampliacións virtuais nin con falsas interpretacións do Decreto de Xestión Integrada. Dende a Plataforma insistiron en que a cidadanía mariñá ten que mobilizarse como xa o fixo no 2010 para frear a perda duns servizos sanitarios ganados a pulso no seu día que non podemos malograr, animaron a asistir aos actos públicos aínda pendentes de celebrar na Casa da Xuventude de Mondoñedo o luns 25 ás 20:00hrs e na Antiga Biblioteca de Burela o martes 26 á mesma hora para recibir información de primeira mao. Segundo advertiron, A Mariña non está en disposición de tolerar mais promesas sobre ampliacións virtuais dun hospital que xa non da mais de si, tampouco mais recortes orzamentarios en persoal e moito menos falsas e interesadas interpretacións dun Decreto de Xestión Integrada de ámbito provincial porque coñecemos sobradamente os seus efectos noutras provincias onde xa se aplicou; o territorio mariñao e os 14 concellos da actual Área Sanitaria conta coas características suficientes para ter unha xestión sanitaria propia sen dependencias alleas que deteriorarían a calidade asistencial e as posibilidades de mellorala. Para A plataforma o “silencio cómplice” dos representantes na comarca do Partido Popular apos o anuncio da Xerencia de Atención Primaria na Provincia sobre a aplicación no prazo dun mes do Decreto de Xestión Integrada “é clamoroso e ven a sumarse á falta de resposta dos seus representantes aquí e no Parlamento Galego diante da ausencia de orzamento para a prometida ampliación do Hospital e os recortes en materia de persoal para o mesmo centro que poñen negro sobre branco o incumprimento dos compromisos coa comarca do presidente Feijoo”.