O traballo "Bocarribeira" de alumnos de Bande (Ourense) gaña o premio Otero Pedrayo en Bacharelato

O traballo “Bocarribeira” presentado por estudantes de Bande gaña o premio Otero Pedrayo en Bacharelato e un podcast cargado de humor de alumnos de Vigo son premiados na categoría de ESO.

A Fundación Otero Pedrayo anunciou os gañadores do Premio Anual Otero Pedrayo para estudantes de ESO e Bacharelato. Na categoría de Bacharelato o xurado acorda concederlle o premio a “Bocarribeira”, traballo presentado polas alumnas Marta Bouzo Álvarez e Aldara Rodríguez Rodríguez de primeiro curso de Bacharelato do IES Aquis Querquernis de Bande. A peza audiovisual rende homenaxe á literatura na obra poética de Ramón Otero Pedrayo.

Na categoría de ESO, o xurado decide premiar o traballo grupal presentado baixo o pseudónimo “O borracho”, un podcast cargado de humor e actualidade presentado polo alumnado de terceiro da ESO do IES Alexandre Bóveda de Vigo.

Ademais dos gañadores nomeados, o xurado do premio Otero Pedrayo para estudantes concedeu un accesit ao traballo ”Fálase tanto… e con tan pouco tino” presentado polo grupo de 4º ESO do IES Breamo de Pontedeume. O alumnado converteu en historia ilustrada o conto de don Ramón “O purgatorio de don Ramiro”.

Nesta cuarta edición, o xurado estaba constituído por Gonzalo Allegue, Antón Palacio, Malores Villanueva, María José Bravo Bosch e Patricia Arias Chachero, como secretaria da Fundación, con voz pero sen voto.

A entrega, con todos os premiados, farase o vindeiro xoves 13 de marzo ás 12:00 na Casa Grande de Cima de Vila, en Trasalba. Ao acto asistirán o Secretario Xeral de Política Lingüística, Valentín García, e o presidente da Fundación Otero Pedrayo, Eduardo López Pereira.