Lugo rexistra o refacho de vento máis forte e o maior volume de precipitacións en Galicia: 100 quilómetros por hora no Courel e 20 litros por metro cadrado nos Ancares

O inverno non nos da tregua este ano na provincia de Lugo. Xa está aquí Ivo. Continúa chovendo con forza por momentos. O río Miño vai absolutamente desbordado ao seu paso pola capital da provincia e o tránsito peonil é imposible no tramo do Paseo do Miño entre o Balneario e o antigo restaurante O Muiño, dado que o camiño está sumerxido baixo as augas. 

Tamén hai varias estradas asolagadas na comarca da Terra Chá, onde o paso é totalmente imposible, e hai neve na Montaña, que está a condicionar a circulación do tráfico rodado.

De feito, a Dirección Xeral de Tráfico (DXT) informou da prohibición de circulación para camións e vehículos artículados na estrada LU-633 entre o km 0, en Pedrafita, e o km 20 no Queixadoiro, debido á neve, na zona do Alto do Poio.

Na mesma zona, continúan transitables a Nacional 6 (N-6) e a Autovía do Noroeste (A-6), aínda que a meteoroloxía adversa obriga a circular con precaución.

Deste xeito, a DXT pediu especial atención na A-6 entre os quilómetros 429 (O Castro, León) e 440 (Doncos, Lugo); igualmente, mantense o nivel verde, transitable con precaución na N-6, entre os quilómetros 432 (O Castro, León) e 438 (A Pía, Lugo).

VENTO E PRECIPITACIÓNS NA MONTAÑA

O refacho máis forte de vento en Galicia nas últimas horas quedou rexistrado no Courel, 102 quilómetros por hora. O vento sigue soprando con forza, pero nada que ver en todo caso cos case 170 quilómetros por hora rexistrados onte en Viveiro.

En canto ás choivas, tamén temos o valor máximo de Galicia na nosa provincia. Nos Ancares caeron 20,4 litros por metro cadrado nas últimas horas, concretamente no concello de Cervantes. 

Por certo, mantense a alerta laranxa no litoral polo vento e ondas que poden superar os sete metros de altura. Tamén se mantén a alerta amarela na Montaña, neste caso pola neve.

CONTINÚA O FRÍO...

En todo caso, parece que nas últimas horas en boa parte da Montaña de Lugo choveu máis que nevou e o pode circularse sen maiores problemas, agás en casos concretos, por case toda a rede viaria principal. En todo caso, as autoridades piden prudencia aos condutores, especialmente na rede secundaria.

Para hoxe agardamos máis do mesmo. Precipitacións intermitentes, vento e frío. A temperatura mínima baixou hoxe ata os 4ºC e a máxima non pasará de 9ºC nesta xornada en Lugo capital. A cota de neve segue estando en 900 metros na Montaña.