Farruquiño abre en Lugo o seu sexto supermercado na provincia

Un novo espazo de alimentación no corazón da cidade.  Farruquiño inaugurou na cidade de Lugo o seu sexto punto de venda na provincia, situado no número 3 da rúa Santiago, a poucos metros de tres Patrimonios da Humanidade: a Muralla, o Camiño de Santiago e a Catedral. A nova tenda nace coa vontade de recuperar a actividade comercial dunha zona que quedara sen referencia alimentaria nos últimos anos.

O supermercado abrirá os 365 días do ano cun horario amplo: de luns a sábado de 09:00 a 21:00 horas e os domingos e festivos de 10:00 a 14:00 horas. 

“Un supermercado clásico cos produtos de sempre”

A xerente da cadea, Sonia Romay, sinala que esta apertura “trae á cidade un supermercado clásico cos produtos de sempre, con prezos moi competitivos e con toda a tradición da montaña”. Lembra que Farruquiño nace ligado á súa propia gandería en Cospeito e ao obrador artesanal que a empresa mantén na Fonsagrada, dous piares que garantizan unha oferta fresca e de calidade.

Dentro das instalacións da rúa Santiago, Romay explicou que “o forte son as primeiras marcas a prezos moi competitivos”, pero tamén un amplo catálogo de produto fresco: carne de porco e tenreira, elaboracións propias e embutidos tradicionais. Entre risas, destacou uns touciños “con moi boa pinta e moi apropiados para esta época”.

Un obrador artesanal con filosofía familiar 

O obrador da Fonsagrada é un dos elementos máis coidados da marca. A xerente describe ese espazo como “moi humilde e familiar”, onde a elaboración “é completamente natural e manual: embutido á man, atado á man, cada peza moi mimada”.

Aínda que están a realizar obras de ampliación, a empresa insiste en manter a mesma filosofía tradicional: evitar procesos industriais e preservar a identidade do produto. Ese trato artesán permítelles cumprir con todos os criterios europeos para incluso poder exportar. 

Seis tendas e seis formas de consumir

Cos seus seis establecementos na provincia, Farruquiño tamén observa as diferenzas culturais e gastronómicas entre comarcas. “Nada ten que ver un mariñán cunha persoa da Fonsagrada ou cunha de Lugo”, explica Romay. “Somos diferentes, comemos diferente, falamos diferente…”.

A apertura na rúa Santiago recupera un lugar moi transitado —xunto ao colexio das Xosefinas, o Camiño de Santiago e a dous pasos do casco histórico—. Mesmo os antigos tendeiros e propietarios do local, como Genaro, celebran o regreso da actividade comercial: “Desexaba con todas as súas forzas que volvera abrir unha tenda”, lembra Romay. 

O equipo, clave do proxecto

A xerente tamén quixo destacar “o equipo de traballo”, ao que atribúe boa parte do éxito: “Non se podía facer nada sen eles”.

O cocido, estrela das mesas de Nadal

De cara ás festas, Farruquiño percibe tendencias curiosas. “Está aumentando o consumo de cocido para as mesas de Nadal”, apunta Romay, quen tamén subliña o crecemento da demanda de butelo. Produtos que, segundo explica, representan a verdadeira gastronomía da provincia de Lugo, diversa pero unida por unha identidade común.

Coa súa chegada á capital, Farruquiño incorpórase xa á vida diaria da veciñanza lucense, reforzando a presenza dun comercio próximo e con forte raíz territorial.