O BNG de Cervo cualificou de “extremadamente dura” a proposta da dirección de Cerámicas de Sargadelos de prescindir de 41 persoas de 89 na planta de Cervo e 27 de 84 da de Sada, nunha decisión que opta por prescindir do fondo cultural e o capital humano como valores mais importantes do proxecto fundado por Luís Seoane e Isaac Díaz Pardo. Os nacionalistas ofrecen todo o seu apoio e solidariedade ao cadro de persoal de Sargadelos e pregúntanse si despois de tres anos de EREs encadeados cuxas facturas pagaron exclusivamente as traballadoras e traballadores de Cervo non haberá algunha factura da que sexan responsábeis os actuais e anteriores xestores do grupo. O BNG criticou a decisión da dirección de Cerámicas de Sargadelos e O Castro de prescindir de 41 das 89 persoas que forman parte do cadro de persoal da planta de Cervo, ao considerala “desproporcionada e inxusta” coas traballadoras e traballadores da cerámica que “sufriron varios EREs encadeados dende 2010 facéndolles perder postos de traballo, prestacións económicas e cotizacións sociais”, nuns durísimos esforzos para salvar a empresa que semella, “non viñeron acompañados dunha xestión empresarial eficaz e coherente coas esixencias impostas ao cadro de persoal.” Os nacionalistas cervenses ofreceron todo o seu apoio e solidariedade ao cadro de persoal de Sargadelos, como xa o fixeron con anterioridade, animando a que defendan os seus dereitos coa mesma contundencia coa que @s trata a patronal. Dende o Bloque Nacionalista Galego poñen en cuestión aos actuais e anteriores xestores do grupo cerámico de quen descoñecen “cal é a súa estratexia empresarial,  á vista das circunstancias están prescindindo do fondo cultural e do capital humano que foron ate agora o principal valor deste proxecto empresarial e cultural. Por último pregúntanse si o millón de euros ofrecido pola Consellaría de Economía en 2010 – 400.000 a fondo perdido e 600.000 nun crédito do IGAPE – “chegaron no tempo e na forma en que se prometeron” e en todo caso constatan que “ou non foron ben aplicadas ou non serviron para os fins previstos” e sobre isto tanto a Xunta como a empresa deberían dar explicacións pormenorizadas.