A directora xeral de Comercio, Sol Vázquez Abeal, resaltou o papel do Centro Comercial Aberto de Ribadeo - ACISA como dinamizador do comercio do municipio lucense. A asociación é a protagonista esta semana da campaña “A semana do teu comercio: unha semana, un comercio, unha historia”, coa que a Consellería de Economía e Industria pon en valor o traballo desenvolvido polos 52 centros comerciais abertos (CCAs) existentes en Galicia, dedicándolles unha semana do ano a cada un deles. Vázquez Abeal puxo de relevo o traballo que ACISA realiza non só a prol do comercio e dos seus preto de 200 asociados senón da revitalización da súa zona de influencia. Neste sentido, a directora  subliñou a importancia dos centros comerciais abertos na dinamización das vilas e cidades, e recordou que a Consellería vén de resolver apoios por dous millóns de euros para asociacións de comerciantes dos que resultaron beneficiarios os 52 CCA galegos e 24 agrupacións de mercados. No tocante ao traballo do Centro Comercial Aberto, Vázquez Abeal resaltou o seu programa de feiras de stocks e noites abertas, así como a organización de xornadas gastronómicas e outras citas que permiten ao sector comercial traballar de xeito conxunto coa hostalería. A directora, que estivo acompañada pola delegada territorial da Xunta en Lugo, Raquel Arias, fixo entrega dun diploma de recoñecemento á traxectoria da xoiería Carreira, resaltando o desempeño deste comercio no desenvolvemento comercial da vila durante décadas. Neste sentido, remarcou que un dos obxectivos da Consellería de Economía e Industria coa campaña “A semana do teu comercio” é realzar o bo facer dos negocios locais que souberon adaptarse aos tempos acadando a pervivencia do negocio a través da calidade e proximidade ao cliente. Vázquez Abeal salientou a aposta da xoiería Carreira, unha empresa de carácter familiar, que está próxima a cumprir 81 anos na vila sabendo diversificar o seu negocio. Pola súa banda, Raquel Arias apelou á necesaria colaboración entre administracións e tamén entre estas e as empresas para dinamizar o tecido socioeconómico. No caso de Ribadeo, indicou que, nun pobo que ten o comercio e o turismo como uns dos principais motores económicos, son fundamentais as infraestruturas e os servizos. Por iso, salientou, a Xunta vén apoiando de forma decidida os investimentos neste municipio, destacando a posta en servizo da EDAR, as melloras no peirao de Mirasol ou a Área de Rehabilitación Integral de Rinlo.