Nas culturais e artísticas destacan o Festival de verán que terá lugar no teatro Pastor Díaz; os talleres de teatro, de barro, de elaboración e decoración de papel reciclado ou de xabón artesanal; ademais das clases de  baile moderno, funky, hip-hop e bachata. As actividades formativas centraranse nos cursos programados no plan de formación da Dirección Xeral de  Xuventude e Voluntariado que para este 2013 serán os seguintes: curso básico de información xuvenil; animación de lecer e tempo libre; teórico de monitor sociocultural; elaboración de proxectos de animación sociocultural e turística, e un seminario sobre o procedemento de recoñecemento de competencias de información xuvenil. Destes cursos beneficiaranse máis de 100 persoas, e suporán unha carga formativa superior as 260 horas. Ademais, tamén se organizarán cursos de fotografía dixital e de informática. Dentro das actividades de lecer organizaranse unha serie de excursións, festas, viaxes a neve, excursións de fin de semana ao Caurel, para practicar distintos deportes de montaña, aloxándose nun albergue de montaña da Federación Galega de Montañismo. No ámbito dos deportes e xogos programaranse campionatos de fútbol sala e tenis de mesa, cursos de capoeira, de surf e de aerobic e continuarase coa escola de xadrez, que é un dos puntos fortes do Espazo Xove de Viveiro e que ten o seu cumio na organización do XIII edición do  Torneo de Xadrez “Cidade de Viveiro”. En 2012 1.384 foron os participantes das 53 actividades deportivas e xogos. No Espazo Xove tamén se expiden os distintos carnés para a mocidade, como son: carné xove, carnés de alberguista, o carné de estudante (ISIC) o carné Teacher ou o carné internacional de viaxes para mozos e mozas non estudantes (IYTC). No 2012 expedíronse  máis de 270 carnés para a mocidade de Viveiro. Así mesmo, o centro conta cunha sala de informática, con acceso gratuíto a internet, e tamén sistema wifi, pola que pasaron máis de 5.000 mozos e mozas en 2012.