O Concello de Burela vén de adxudicar mediante decreto do alcalde, José María González Barcia, a obra de pavimentación do camiño dos Cotos a Ril, incluída no Plano de Obras e Servizos do presente ano 2012. González Barcia manifestou que “o presuposto é de 22.705 euros, e ten un prazo de execución de tres meses; a nosa intención é efectuala a principios do verán, para poder ter máis garantías de mellor tempo”. O alcalde indicou que “este vial está incluído como necesario na enquisa de equipamentos municipais, e polo tanto encaixa perfectamente nas obras que se inclúen nos POS”. González Barcia tamén manifestou que “a obra vai supoñer un beneficio para moitas persoas que usan diariamente este vial, e mesmo para aqueles que o empregan ocasionalmente, para andar, para cruzar en coche desde a Casilla á estrada que vai a San Cibrao, etc.” O alcalde burelés lembrou que “a Deputación sacou o POS de 2012 practicamente a finais de ano, xusto ao contrario do que fixeron as outras deputacións galegas, que o aprobaron en prazo, é dicir, pola primavera; ese foi o motivo de que levemos case un ano de retraso na execución desta obra. Espero que a Deputación de Lugo sexa máis áxil este ano na tramitación do POS”.