O PP esixe á Deputación de Lugo unha actuación urxente nunha estrada de Chantada que ameaza con derrubarse

O voceiro do Grupo Provincial Popular, Antonio Ameijide, e o alcalde de Chantada, Manuel Varela, esixiron a PSOE e BNG unha actuación “inmediata e urxente” na estrada provincial LU-P-1801. A visita á vía, que conecta Chantada con Nogueira e Os Peares, serviu para constatar o elevado risco de derrubamento que presenta á altura do quilómetro 15.

Ameijide cualificou de “alarmante” o estado da estrada, asegurando que “está a desprenderse”. Segundo o voceiro popular, a única intervención da Deputación de Lugo consistiu en "poñer unhas barreiras para evitar o paso pola zona afectada e botar un pouco de formigón na cuneta contraria", sen ofrecer máis explicacións.

Un risco para a seguridade e o medio ambiente

Os populares alertan de que un desprendemento do talude que sostén o firme podería ter graves consecuencias. A caída da estrada non só afectaría a inmobles, viñas e propiedades privadas, senón que tamén suporía un posible dano ao río debido ao arrastre de terras, que provocaría un notable impacto ambiental.

O cambio na Presidencia non supuxo ningún cambio na forma de traballar deste goberno provincial"

Antonio Ameijide

Voceiro do grupo provincial do Partido Popular en Lugo

Desde o PP esixen unha actuación "contundente" para garantir non só a circulación, senón tamén a seguridade. Ameijide recalcou que o obxectivo é previr danos que poderían ser irreparables, tanto a nivel económico como ambiental.

Críticas pola "falta de lealdade institucional"

O voceiro popular tamén lamentou a “nula sensibilidade institucional” do goberno provincial de PSOE e BNG, ao que acusa de cortar a estrada durante varios días sen informar previamente ao Concello de Chantada. Esta situación, afirma, demostra unha falta de lealdade e comunicación coas administracións locais.

Resulta imprescindible que o goberno da Deputación actúe con rapidez e eficacia"

Antonio Ameijide

Voceiro do grupo provincial do Partido Popular en Lugo

Para Ameijide, este episodio reflicte que non houbo melloras na xestión provincial tras o cambio de goberno: "Vemos como o cambio na Presidencia non supuxo ningún cambio na forma de traballar deste goberno provincial, mantendo o autoritarismo imposto polo anterior presidente e carente da lealdade institucional necesaria". 

O popular insiste en que "resulta imprescindible que o goberno da Deputación actúe con rapidez e eficacia, adoptando as medidas necesarias para estabilizar o talud".