Galicia pon límites ao móbil e á intelixencia artificial nas aulas coa nova Lei de Educación Dixital

A nova Lei de Educación Dixital de Galicia xa está enfornando. O conselleiro de Educación, Román Rodríguez, explicou en COPE que a norma, pioneira en España, ten como obxectivo principal fixar un marco claro de dereitos e deberes para toda a comunidade educativa e encher un baleiro legal existente, abordando dende  o uso de dispositivos móbiles ata a intelixencia artificial (IA) nas aulas

Un marco para o "sentidiño" dixital

Rodríguez subliña que a lei xorde da necesidade de adaptarse a unha sociedade cada vez máis dixitalizada. "Non podemos renunciar ao uso da tecnoloxía no sistema educativo, pero debemos aproveitar o bo e intentar minimizar os aspectos negativos", afirma. A norma pretende que a tecnoloxía sexa "sinónimo de positivo" e controlar os seus posibles riscos, como o ciberacoso.

Un dos puntos clave é o uso da intelixencia artificial, que o conselleiro define como "unha ferramenta poderosísima" para a aprendizaxe e a inclusión. Con todo, a lei establecerá límites para que a IA nunca poida substituír o profesor nin anular o esforzo do alumno. A administración educativa seleccionará as plataformas de IA autorizadas para o seu uso nos centros.

Non podemos poñerlle portas ao campo, temos que ser conscientes de que é unha gran ferramenta""

Román Rodríguez

Conselleiro de Educación 

O conselleiro insiste en que non se trata de prohibir, senón de usar a tecnoloxía con criterio. Respecto á IA, comentou: "Non podemos poñerlle portas ao campo, temos que ser conscientes de que é unha gran ferramenta, pero hai que usala con sentidiño".

Móbiles e gravacións, baixo control

En canto aos teléfonos móbiles, afínase a regulación actual. Mantense a prohibición do seu uso no recinto escolar, unha medida que, segundo os centros, foi "tremendamente positiva" para a convivencia, asegura Rodríguez. Non obstante, si se poderán empregar como ferramenta pedagóxica, pero só nos dous últimos cursos de secundaria, cando se considera que o alumnado ten máis madurez.

A lei tamén prohibirá as gravacións non permitidas aos docentes. Segundo o conselleiro, detectáronse "casos de alumnos que gravan os profesores e o publican nas redes sociais sen que houbese ferramenta legal para combater esa situación". A partir de agora, estas accións poderán ser sancionadas, mentres que as gravacións con fins didácticos e autorizadas seguirán permitíndose.

A implicación das familias e do profesorado, clave

O éxito da norma, recoñece o conselleiro, require da implicación das familias. A lei espertou unha gran preocupación social, como demostran as máis de 600 achegas da sociedade civil na súa fase inicial. "De nada vale que na escola se limite o uso dos móbiles se ao saír hai barra libre", exemplifica Rodríguez, quen avoga por crear unha "contorna saudable" tamén no fogar.

A Xunta xa está a desenvolver charlas informativas para as familias con especialistas de diversos ámbitos para axudalas a xestionar o uso da tecnoloxía. Tamén arrancaron hoxe encontros divulgativos sobre a futura norma.

No novo escenario que se abre coa cada vez maior presenza do dixital, o profesoradoten que estar en continua actualización . Nese sentido, a Lei  vai facer obrigatoria a formación dixital dos docentes para determinadas competencias entendidas como estratéxicas. Esta obrigatoriedade cinguirase a “propostas concretas que se consideren imprescindibles para o bo funcionamento do sistema educativo”, detallou o conselleiro na xornada divulgativa.

Os coñecementos dixitais contarán como méritos nos procesos de ingreso na función pública docente así como para os procedementos de provisión de postos de traballo de determinadas características. Valoraranse de forma concreta a competencia dixital dos aspirantes e a súa idoneidade para o desempeño destas funcións e, de ser o caso, poderá esixirse un nivel mínimo acreditado de competencia dixital para determinados postos.

A Consellería de Educación promoverá convenios de colaboración coas universidades públicas para facilitar que o persoa docente universitario das facultades de Ciencias da Educación e equivalentes poida acceder ás actividades de formación continua en competencia dixital organizadas pola Xunta. É dicir, que o profesorado universitario poderá tamén beneficiarse da formación da Consellería de Educación.

A nova  Lei de Educación Dixital entrará en breve en exposición pública: o obxectivo do goberno galego é sexa remitida ao parlamento antes de que remate este 2026, para completar a súa tramitación o antes posible.