RIBADEO
O alcalde de Ribadeo critica os duros requisitos da Xunta para contratar socorristas
Fernando Suárez advirte que como pase algo non será culpa dos concellos senón da Xunta de Galicia
Cope de la Costa
Tiempo de lectura: 1'
Actualizado 15:05
O alcalde de Ribadeo, Fernando Suárez, critica que a dureza terrible dos requisitos da Xunta fai moi complicada a contratación de todos os socorristas que precisa Ribadeo para prestar os servizos axeitados nas súas praias durante o vindeiro verán.
Desde o Concello venlle de comunicarlle á Vicepresidencia e Consellería de Presidencia, Administracións Públicas e Xustiza, que “a planificación do Concello é a de dispoñer de servizo de socorrismo nas praias de Os Bloques, Os Castros, As Illas, Esteiro e As Catedrais, dende o 15 de xuño ata o 14 de setembro”. Nese escrito dise que “outra cousa son as posibilidades reais que teremos á hora de poder cubrir este servizo debido á escaseza de candidatos que cumpran coas excesivas esixencias que a Xunta estableceu nos últimos anos”.
O Concello paga máis e por máis tempo
O rexedor asegura que “desde o Concello comprometémonos a facer as contratacións dos socorristas, sempre que poidamos. Somos os primeiros en facelo, pagamos máis e contratamos por máis tempo. Pero a dureza terrible dos requisitos da Xunta fan moi complicado todo este procese. Case ningún Concello, con independencia da cor política, da cumprido con todos eses requisitos”. E engade que “mentres isto ocorre en Galicia vexo como os nosos veciños asturianos non teñen este problema, garantindo un servizo adecuado en canto a número e calidade do seu persoal, en contraposición coa normativa galega que provoca que cada ano dispoñamos de menor número de candidatos a ocupar este servizo e consecuentemente nos vexamos na obriga de deixar determinadas praias sen socorristas á vez de non cubrir nas debidas condicións outros areais”.
Fernando Suárez subliña que “como pase algo neste verán, non será culpa dos Concellos. A responsabilidade sobre a protección das vidas será da Xunta e dos miopes que defenden ese xeito de proceder”.
- item no encontrado