Voz de aniversario: o CEIP As Gándaras celebra 50 anos de historia con protagonismo infantil

Os nenos toman a palabra. No CEIP As Gándaras, os preparativos para a celebración do 50º aniversario están collendo forza e ilusión, sobre todo entre o alumnado. Os nenos e nenas do centro non só son conscientes da importancia deste medio século de historia, senón que tamén desexan participar activamente nos actos conmemorativos. 

Grazas á chegada da nova radio escolar ao centro, segundo nos conta Inma, a profesora que dirixiu a gravación. O alumnado gravou un audio publicitario animando a toda a comunidade a sumarse á gran festa que se celebrará o sábado 21 de xuño. Esta iniciativa nace do desexo dos rapaces de deixar a súa pegada nesta data tan especial.

Unha semana chea de actividades

Do 16 ao 20 de xuño, o CEIP As Gándaras acollerá unha semana de celebracións dirixidas á comunidade educativa actual. Obradoiros de percusión, actuacións da banda municipal, música tradicional, xogos populares, maxia e cine na rúa son só algunhas das actividades previstas para crear un ambiente festivo e participativo dentro do colexio. 

21 de xuño: a gran festa aberta a toda a cidadanía

O día central das celebracións será o sábado 21 de xuño. A xornada, aberta a toda a comunidade, incluirá unha exposición de material didáctico, fotografías antigas, trofeos e outros obxectos que repasan a historia do centro.

Haberá tamén actuacións musicais, entre elas a da Banda Filarmónica de Lugo, e unha comida popular para nenos e adultos, que será un dos momentos máis destacados da xornada. Para asistir, será necesario retirar tickets con antelación, dispoñibles xa no propio colexio e, a partir do 9 de maio, tamén en establecementos da zona como Casa Botana.

As entradas serán numeradas e incluirán non só a comida, senón tamén o acceso a un sorteo de agasallos, un espectáculo de maxia pola tarde e outras actuacións musicais.

Un centro con historia

Inaugurado oficialmente en 1974, aínda que con actividade lectiva desde 1971, o CEIP As Gándaras leva 50 anos sendo unha referencia educativa no barrio lucense do mesmo nome.

Durante este tempo, o colexio consolidouse como un piar fundamental na formación de centos de nenos e nenas, e como símbolo do esforzo colectivo por construír un futuro mellor a través da educación.

Este 50 aniversario é moito máis que unha celebración: é unha oportunidade para lembrar, agradecer e mirar cara ao futuro, con toda a comunidade -incluíndo antigos alumnos, profesores e veciñanza- como protagonista.