Antía Muíño volve a casa para presentar no Teatro Principal de Santiago o seu universo anfibio: "Estou un pouco nerviosa"

A artista compostelá Antía Muíño presentará o seu novo traballo, Anfibia por veces, este xoves día 5 de marzo no Teatro Principal de Santiago. A cantora, compositora e guitarrista móstrase "un pouco nerviosa, pero, ben, contenta, ilusionada" ante a estrea. Segundo Muíño, será "unha data moi especial" por ser a primeira vez que amosará este traballo en directo.

Muíño adiantou que o concerto está a ser preparado para ser diferente e moi coidado a nivel visual e escénico. "Queríamos que esta data no Principal, por ser en Santiago, por ser a primeira, fose especial", afirma. Ao evento asistirán as colaboradoras que participaron no disco, ademais da súa banda. A intención é que cada canción teña o seu "propio universo particular e a súa propia atmosfera", de xeito que "cada canción que toquemos, pois, respire un ambiente determinado".

Anfibia: a identidade dun disco ecléctico

O título do álbum, Anfibia por veces, é unha declaración persoal da artista. Para Muíño, un ser anfibio "é un ser que vive en moitos elementos, que poden ser como ata contraditorios entre si". A cantautora confesa que se sinte identificada con esta idea: "Séntome así, moitas veces, tanto na miña música como, incluso, a veces, a nivel vital".

Este eclecticismo musical non é, segundo explica, unha "busca consciente", senón que as cousas "saen así un pouco soas". A artista cre que tras moitos anos de formación e de subir aos escenarios, no momento de compoñer, "aparecen moitas cousas que non sei moi ben de onde saen, pero que están aí". O disco combina diferentes estilos, como a chacarera de influencia latinoamericana en "Eu Canto", con momentos de introspección e outros de celebración, como o pasodobre "Amor Fugaz".

Aparecen moitas cousas que non sei moi ben de onde veñen, pero que están aí"

Antía Muíño

No disco tamén se inclúen temas como Cien Olivos, unha canción que escribiu "como un agasallo" e que é "un canto de agradecemento ao amor, á compaña". 

Tras a estrea en Santiago, a xira de Antía Muíño continuará por outras cidades. Xa hai datas confirmadas en Ferrol (22 de marzo), Donosti, Madrid, Barcelona e Huesca, nunha xira que a levará "por moitos sitios da península".