Belém Tajes conquista o Premio Narf coa súa ponte musical entre Galicia e Latinoamérica

Belém Tajes é a gañadora do XVII Concurso Fran Pérez "Narf" para grupos e artistas musicais, promovido pola Deputación da Coruña. A gala final celebrouse na noite do sábado no Salón Teatro de Santiago, onde o xurado destacou o seu "risco á hora de facer ponte entre a música galega e latinoamericana", así como a calidade dos seus arranxos.

A cantante e compositora coruñesa, que formou parte de bandas como Vudú, Aliboria ou Luar na Lubre, publicou en novembro de 2024 o seu primeiro álbum, Amar o mar. Neste traballo, Tajes mestura a música tradicional galega e latinoamericana con toques de pop e electrónica, unha proposta que o xurado considerou salientable. O ditame subliñou "as letras moi coidadas e unha aposta singular e con personalidade na instrumentación".

As letras moi coidadas e unha aposta singular e con personalidade na instrumentación"

Xurado do premio Narf sobre o traballo de Belém Tajes

Unha final moi disputada

Na gala final, que estivo conducida polo xornalista Luís Pardo e contou co artista visual Iván Torres, o segundo posto foi para Marián, que recibiu 2.000 euros, e o terceiro para Vimbio, con 1.500 euros. As tres bandas finalistas ofreceron actuacións de 15 minutos antes da deliberación do xurado, durante a cal o dúo Caamaño&Ameixeiras actuou como convidado.

Segundo e terceiro premio

Marián, cantante e compositora da Serra de Outes residente en Compostela, está a piques de lanzar o seu álbum debut, que conta coa colaboración de Guadi Galego. O xurado destacou dela "a súa calidade vocal, así como os arranxos e a produción", calidades que a levaron a ser seleccionada na aceleradora #SonEmerxente de AGADIC.

Pola súa banda, Vimbio é a nova banda de Ponteareas liderada por Álex Arnoso (ex SonDaRúa), que fusiona o rap co metal dos 90 e 2000. O xurado valorou "o envoltorio de épocas diferentes de poética galega nunha banda de guitarras, máis contundente".

Un certame para lembrar a Narf

O Concurso Fran Pérez “Narf" ten como obxectivo apoiar e promocionar os artistas musicais de Galicia, ao tempo que difunde a figura do músico que lle dá nome. Entre os gañadores de edicións anteriores atópanse nomes tan coñecidos como Mounqup, Bala ou Familia Caamagno.