Suárez Barcia critica o silencio que escoitan as súas propostas por parte das administracións autonómica e estatal. O rexedor dixo que “o que sen dúbida é un motivo de orgullo e de alegría para todos os veciños deste concello por ter unha das praias máis importantes, máis coñecidas e máis bonitas do mundo como é o areal das Catedrais ou de Augas Santas, que é como lle chamamos aquí, e que é recoñecido día tras día por diferentes medios de comunicación do país, do Estado, a nivel internacional e a onde cada vez ven máis xente”. Suárez Barcia considera que “no lado oposto a todo isto está o silencio cómplice, a displicencia con que as diferentes administracións con responsabilidades neste entorno, como a Xunta de Galicia ou o Ministerio de Medio Ambiente, non están en absoluto atendendo ás múltiples e cordiais chamadas que desde o Concello estamos a facer para complementar, para dialogar, para intentar facer actuacións mínimas de impacto e de inversión, pero que garantan que esta praia siga a ser un lugar de referencia e que non acabe morrendo de éxito e de masificación, que é o que todo apunta que vai acontecer en breve”. O alcalde de Ribadeo explicou que “si ben en semana santa enviarámoslle unha misiva ao presidente da Xunta e outra ao ministro de Medio Ambiente e Medio Rural para buscar un diálogo, a día de hoxe non tivemos nin siquera unha contestación formal, escrita ou verbal. De aí que, aproveitando a selección da praia das Catedrais coma unha das marabillas naturais do Estado por unha coñecida compañía aseguradora, a través das redes sociais e do voto de ducias de milleiros e milleiros de internautas, hoxe mesmo veño de enviarlle unha nova comunicación ao presidente da Xunta para convidalo a que se reúna conmigo para falar de tu a tu, abertamente e ao mesmo nivel, para garantir que esta marabilla natural non sexa algo do pasado, senón que pode ter futuro e que entre todos busquemos medidas de conciliación, medidas que permitan que todo o mundo a poida visitar, pero medidas que impidan que se estrague”. Suárez Barcia subliñou que “o que estamos pedindo é diálogo para abordar e resolver os problemas e que a nosa sociedade, a nosa economía e o noso país saian reforzados aproveitando os noso recursos”.