A agrupación do Colectivo chilindrín PENALBA, naceu no ano 2012, como proxecto de recuperación do canto e da música tradicional en Celeiro. Está dirixida por Dani “Caxete” e Antón Docampo. O seu repertorio variado centraliza as súas cancións no mundo do mar e dos mariñeiros, e interpretan cancións propias, obra do propio Caxete, e outras cancións populares de diversos autores de recoñecido prestixio. A súa estrea produciuse no mes de xuño do 2013 na Casa do Forno de Celeiro, e dende aquel día foron numerosas as actuacións realizadas na xeografía da Comarca da Mariña. Mañá sábado, participarán no ciclo de actuacións musicais que organiza o Concello de Cervo, na casa da cultura de San Cibrao a partir das 20 horas, con entrada gratuita para os asistentes.