Socialistas e nacionalistas seguen a avanzar no seu "proxecto común" para Lugo

Os dous socios de goberno do Concello de Lugo mantiveron este luns unha comisión de seguimento co obxectivo de avaliar o traballo realizado nos últimos meses e avanzar na "folla de ruta" compartida para a cidade.

Durante o encontro, socialistas e nacionalistas puxeron en valor "a boa sintonía e a efectiva colaboración", destacando a importancia de continuar impulsando "un modelo de cidade cohesionada, centrada nas persoas e con capacidade para acompañar os proxectos vitais e laborais da veciñanza".

"TRABALLO CONXUNTO" E "ESTRATEXIA COMPARTIDA"

Este tipo de reunións periódicas forman parte da dinámica interna do goberno local e teñen como finalidade "consolidar un traballo conxunto, tanto a nivel territorial como social, cunha visión estratéxica compartida", sinalaron.

O seguimento da acción de goberno complétase a través doutras ferramentas propias do funcionamento da institución, como as Xuntas de Goberno Local semanais nas que están representadas tanto o Partido Socialista (PSdeG) como o Bloque Nacionalista Galego (BNG), que permiten manter unha interlocución constante e unha acción sostida no tempo.