A Xunta de Galicia incrementa en case un 19% as axudas ás asociacións de comerciantes da comarca da Mariña para accións de dinamización do comercio local, tanto nos centros comerciais abertos como nas prazas de abastos. A delegada territorial, Raquel Arias, destacou este dato durante a rolda de prensa na que explicou o programa de axudas co que a Consellería de Economía e Industria fomenta o asociacionismo no  comercio co obxectivo último de “contribuír á construción dun sector comercial máis competitivo e dinámico”. A consellería resolveu a distribución de axudas por importe de  preto de 90.000 euros (89.810 euros) para a revitalización e dinamización dos centros comerciais abertos de Viveiro, e Ribadeo, así como para á asociación de comerciantes da praza de abastos do municipio ribadense. Esta liña de axudas servirá para “impulsar accións de dinamización da demanda” no comercio local, que é “o que máis preto está dos veciños, colabora na sostibilidade e no pulso das vilas, e ao que, polo tanto, aféctalle o que nelas ocorra”, segundo explicou a delegada, que estivo acompañada na presentación polo xefe territorial de Economía e Industria, José Manuel Vázquez Leirado. A metade das actuacións, na Mariña Deste xeito, grazas a estas axudas, os centros comerciais abertos e prazas de abastos beneficiadas desenvolverán nesta zona 31 actuacións relacionadas coa dinamización comercial, sistemas de fidelización de clientes, sinalización comercial externa, unidades xerenciais e instalacións e equipamentos (nas prazas de abastos). Esta cifra supón que prácticamente a metade das actuacións que se levarán a cabo no conxunto da provincia (un total de 64) terán lugar na Mariña. Arias fixo mención especial ás prazas de abastos por ser “referentes na venda de produtos frescos e de calidade”. Neste eido, as axudas inciden na mellora de dotacións, apostando “polos mercados que levan a cabo unha venda moderna, con servizos, diversidade e excelencia, buscando conservar a tradición da compra ao tempo que se da resposta ás novas demandas dos consumidores”. A delegada aplaudiu o labor que desenvolven tanto os centros comerciais abertos como as asociacións de comerciantes das prazas de abastos, “constantemente preocupados por subir o listón, por mellorar a calidade, atención e o servizo que prestan aos consumidores” e animou aos responsables de comercios retallistas doutras vilas lucenses a seguir o camiño que manteñen estas asociacións.