Lois Orosa, director do CESGA: "A factoría de IA é unha porta a Europa dende Santiago"

O Centro de Supercomputación de Galicia, con sede en Santiago de Compostela, foi seleccionado para albergar unha das seis novas factorías de intelixencia artificial que a Unión Europea vai poñer en marcha. Este proxecto nace, segundo explicou nunha entrevista en Cope Galicia o director do CESGA, Lois Orosa, como parte dunha estratexia da Comisión Europea para que “Europa sexa soberana en temas de intelixencia artificial”. A iniciativa componse dun supercomputador especializado en IA, que se instalará no polígono da Sionlla, e un conxunto de servizos avanzados para empresas e institucións.

Un fito histórico para Galicia

Lois Orosa cualificou a concesión como un “fito histórico” non só para o centro, senón “para Galicia enteira”. A factoría funcionará como un proxecto de ámbito nacional, representando a España, e contará con socios estratéxicos como o CSIC, as tres universidades galegas, o centro tecnolóxico Gradiant e o hub DataLife. Para Orosa, esta iniciativa supón “unha porta aberta a Europa dende Santiago” e atraerá talento e empresas de todo o continente.

Especialización estratéxica en 'One Health'

A candidatura galega presentou unha especialización estratéxica no concepto coñecido como ‘One Health’ (unha saúde única), que abrangue a saúde humana, animal e ambiental. Esta decisión baséase nas fortalezas de Galicia en eidos como a xestión de recursos mariños, a biotecnoloxía azul, a agricultura, o descubrimento de fármacos e a medicina personalizada. Segundo Orosa, este “factor diferencial” foi clave para que a proposta resultase atractiva para Europa.

Apostar polo eido da biotecnoloxía foi unha decisión estratéxica

Lois Orosa

Director do Centro de Supercomputación de Galicia

Un proxecto con espírito de continuidade

Aínda que a concesión é firme, agora comeza un período de negociación coa UE para concretar os detalles e o calendario. O financiamento inicial cobre cinco anos de mantemento do supercomputador e tres anos para os servizos, pero Orosa subliña que o proxecto ten un “espírito de continuidade”. Con todo, advirte de que non hai que relaxarse: “Temos que ir gañándoo a través da boa execución durante estes anos”.

Temos que ir gañándoo a través da boa execución durante estes anos"

Lois Orosa

Director do Centro de Supercomputación de Galicia

Cun investimento de partida de 82 millóns de euros, a factoría tamén suporá un impulso para o emprego cualificado. Orosa non cuantifica cantos posto de traballo directos vai xerar,  “bastantes decenas”, asegura. O obxectivo nos vindeiros meses é deseñar unha estrutura eficiente para ofrecer servizos de IA a todo tipo de empresas, desde as que non teñen experiencia ata as máis avanzadas, xerando un impacto a nivel rexional, nacional e europeo.