Sexas romano ou castrexo esta información interésache: o Concello de Lugo activa un Plan Especial de Tráfico durante as festas do Arde Lucus
O goberno local fai un chamamento á cidadanía para que siga as indicacións dos corpos de seguridade, empregue o transporte público de ser posible e planifique os seus desprazamentos con antelación
Unha trintena de empresas privadas aportan algo máis de 100.000 euros para a organización do Arde Lucus
Lugo - Publicado el - Actualizado
4 min lectura
O Concello de Lugo vén de activar un Plan Especial de Tráfico para garantir a seguridade e a boa organización durante a celebración das festas do Arde Lucus 2025, que terán lugar os días 12, 13, 14 e 15 de xuño nas rúas e espazos públicos da cidade.
Este plan contempla diversos cortes e restricións puntuais de tráfico que afectan a distintas zonas, en función dos actos programados e da previsión de asistencia masiva de público.
XOVES 12 de XUÑO
Desde as 8:00 horas cortarase o tráfico na Avenida Ramón Ferreiro (no treito entre a Rúa Salvador de Madariaga e a Glorieta Xaquín Lorenzo), onde se instalarán postos de restauración. Esta zona permanecerá pechada ata o luns 16 pola mañá.
A partir das 20:30 horas procederase ao corte do tráfico na contorna da Ponte Romana, tanto na marxe norte como na sur do río Miño, coincidindo coa chegada das lexións romanas.
Loita entre romanos e castrexos no Arde Lucus 2024
VENRES 13 de XUÑO
A Rúa Quiroga Ballesteros e a Praza de Santo Domingo serán unha zona de alto tránsito peonil e tamén o punto de saída e chegada de tódolos espectáculos itinerantes que tamén inclúen postos de comida, polo que o tránsito de vehículos será desviado cara á Rúa San Marcos os días 13, 14 e 15 de xuño.
SÁBADO 14 de xuño
A partir das 7:00 horas e ata o domingo ás 12:00 horas restrínxese o estacionamento en ambos marxes da calzada da Rúa Anxo López Pérez, dende diante do Cantiño Nemesio Cobreros ata Avenida Ramón Ferreiro. Cabe destacar que dende o venres 6 queda restrinxido xa o aparcamento de vehículos na Rúa Alcalde Anxo López Pérez, na marxe dereita, dende a entrada ao aparcamento municipal ata Avenida Ramón Ferreiro.
Debido ao evento das 18:20 horas do sábado, o Asalto ao Monte Medulio, faise preciso manter cortada ao tráfico a Avenida Alcalde Anxo López Pérez dende as 18:00 horas. Ao cortar esa vía, darase entrada e saída puntual por Rúa Cidade de Vigo en dobre sentido de circulación para os residentes e usuarios do aparcamento subterráneo da Praza da Constitución. Do mesmo xeito, dando alternativa adecuada de saída da estación a autobuses interurbanos, é necesaria a reserva de espazos de estacionamento en Rúa Catasol.
Tamén ás 18:00 horas terá lugar o Circo Romano na explanada do Palacio Municipal de Deportes, polo que se establecen accesos alternativos e restricións na zona. Ademais, para a montaxe de instalacións foi necesario restrinxir o estacionamento de autocaravanas na explanada do pavillón, habilitando un estacionamento alternativo en San Fiz, na Rúa Montirón, fronte ao Laboratorio Nacional de Sanidade Vexetal e Hixiene.
O Arde Lucus deixa cada ano imaxes impactantes
Ás 20:30 horas iniciarase o tradicional desfile de tropas romanas e tribos castrexas pola Ronda da Muralla, que permanecerá pechada ao tráfico entre as 20:00 e as 21:30 horas.
DOMINGO 15 de xuño
Ás 11:30 horas celebrarase o desfile de colexios, con saída dende a Praza Santo Domingo e percorrido pola Praza Maior, Praza da Mosqueira e a Ronda da Muralla ata a Porta de San Fernando. Durante o evento cortarase o tráfico na Ronda da Muralla.
chamamento á cidadanía
O Concello fai un chamamento á cidadanía para que siga as indicacións dos corpos de seguridade, empregue o transporte público de ser posible e planifique os seus desprazamentos con antelación.
Este operativo de tráfico busca compatibilizar o normal funcionamento da cidade coa celebración dun evento que cada ano atrae a milleiros de persoas.
Desfile pola Ronda da Muralla
Apoio da empresa privada
A preparación do programa da actual edición do Arde Lucus, a vixésimo cuarta, que arrancará o vindeiro xoves, fíxose posible grazas ao traballo da Área de Xuventude do Concello de Lugo, que, un ano máis, contou coa colaboración público privada.
De feito, na festa deste 2025, o número de empresas privadas patrocinadoras do Arde Lucus aumentou lixeiramente pasando de 26 a 30.
O alcalde de Lugo, Miguel Fernández, mantivo esta unha xuntanza con algúns dos representantes das firmas que colaboran.
Agradeceulles "a súa implicación e apoio á festa e tamén á cidade, porque esta é unha festa que facemos entre todos e todas; de feito, creo o compromiso do tecido produtivo lucense está á altura da implicación que mostra toda a cidadanía co noso Arde Lucus".
O apoio económico dos negocios lucenses permitiu acadar un orzamento de 103.200 euros, aos que se sumou a colaboración das administracións públicas.
É unha contía similar ao do pasado ano, aínda que un pouco inferior, pero "valoramos moi positivamente que as empresas e negocios que colaboran coa nosa festa medre edición tras edición, demostrando que o Arde Lucus non só destaca pola implicación da cidadanía senón polo grao de compromiso dos negocios e do tecido produtivo de Lugo na nosa festa de recreación histórica".