O documental que certifica o futuro da regueifa: "Hai canteira!"

A tradición viva da improvisación oral galega está a vivir un momento de rexurdimento logo de estar a piques de desaparecer hai unha década. Froito desta nova enerxía nace o documental 'Ao son da nova regueifa' , co-dirixido por Saúl Rivas e Manolo Maseda, que narra a viaxe emocional dunha "revolución colaborativa" que permitiu que a regueifa estea "máis viva que nunca".

É o propio Manolo Maseda que apunta á necesidade de dignificar e poñer en valor a regueifa, seguindo o modelo dos bertsolaris no País Vasco, onde os improvisadores son "case semideuses" e enchen pavillóns. Maseda considera que o camiño pasa polo recoñecemento institucional. "O que sería ideal era que, dende o Parlamento Europeo, se recoñecese a transmisión oral tradicional e a regueifa como un ben histórico dentro do que sería patrimonio intanxible da humanidade", asegura.

O que sería ideal era que, dende o Parlamento Europeo, se recoñecese a regueifa como un ben histórico"

Manolo Maseda, codirector do documental

Unha nova xeración sen complexos

Este rexurdimento está impulsado por unha nova canteira de regueifeiros moi novos que Maseda define nesta nova etapa como "unha regueifa solidaria, unha regueifa feminista, baseada na igualdade e na que se traballa desde a horizontalidade". Unha enerxía que, segundo el, serve para empoderar a rapazada a través da poesía oral.

A entrada das mulleres é, de feito, un dos eixos da "revolución" actual. Maceda sinala que, a diferenza do pasado, onde figuras como Lupe de Teo eran "excepcións", hoxe as rapazas son maioría nas aulas onde se aprende a regueifar. Para o director, este é un "indicador de boa saúde" que demostra que "a sociedade está a mudar e a igualdade está enriba da mesa".

A regueifa entra nas aulas

O documental tamén aborda o papel pedagóxico da regueifa como unha "ferramenta para aprender a través do lúdico". Actualmente, uns 20 centros educativos de toda Galicia integran a regueifa como un proxecto competencial, o que Maceda considera "un paso máis para normalizar o uso da nosa lingua".

O documental 'Ao son da nova regueifa' , finalista nesta edición dos premios Mestre Mateo, presentarase este sábado 20 de abril ás 12:00 horas no Auditorio de Galicia, en Santiago de Compostela. 

A proxección do filme, de 60 minutos de duración, virá acompañada de "sorpresas", nun evento que, segundo avanza Maseda, "sabemos cando empeza, pero non cando remata", prometendo unha xornada de celebración arredor da improvisación oral.