O maior plató virtual de España cumpre un ano: rodaxes de cine, publicidade e motor do audiovisual galego

A Deputación da Coruña celebra o primeiro aniversario do Coruña Estudio Inmersivo (CEI), unha infraestrutura estratéxica que en só doce meses consolidou a provincia como un referente en produción audiovisual inmersiva en España. Desde a súa inauguración en febreiro de 2025, o CEI ten acollido unha gran variedade de proxectos, reforzando o posicionamento da Coruña como un destino competitivo para rodaxes de alto nivel.

Un ano de intensa actividade

Neste primeiro ano, o plató, xestionado por Pedralonga Estudios, foi o escenario para escenas dunha produción cinematográfica de Vaca Films o sesiones fotográficas de moda para marcas do grupo Inditex. Tamén acolleu xornadas profesionais do Clúster Audiovisual Galego e proxectos de axencias como Idea Creatividad, Undodez Producións ou Avestudio.

A proxección do estudio reforzouse coa súa presentación en eventos clave do sector como o Festival Internacional de San Sebastián, Iberseries en Madrid e London Focus 2025. O presidente da Deputación, Valentín González Formoso, destacou que o CEI é unha peza clave para a industria cultural e o emprego cualificado. "O CEI é unha aposta estratéxica pola innovación, pola industria cultural galega e polo emprego cualificado na nosa provincia. En apenas un ano demostrou que Galicia pode competir na primeira liña da produción virtual, atraendo proxectos e talento", sinalou Formoso.

Unha inauguración que marcou un antes e un despois

A inauguración do CEI, hai xusto un ano, marcou un fito, e transformouun espazo da antiga Fábrica de Armas nun moderno edificio de 2.000 metros cadrados. O proxecto, cun investimento de nove millóns de euros (cinco de fondos europeos e o resto da Deputación), foi descrito por Alfonso Blanco, presidente do Clúster Audiovisual, como a peza que completaba o "fallo de sistema" do audiovisual galego.

O plató conta cunha gran pantalla semicircular e envolvente de 28 metros de longo e 6 de alto, unha tecnoloxía punteira coñecida como 'Plató Mandalorian'. Manuel Meijide, de Mundos Digitales, explicaba na presentación as súas posibilidades: "Podemos controlar todo o que queiramos". Grazas a esta tecnoloxía, "aquí en Galicia podemos grabar con sol as veinticuatro horas del día se queremos" ou "coller o último minuto do último raio", ademais de recrear "escenarios que son impensables".

No acto inaugural, o ministro para a Transformación Dixital, Óscar López, celebrou que esta "marabillosa tecnoloxía" sexa 'made in Spain', un motivo de "orgullo desa reindustrialización". Pola súa banda, a alcaldesa da Coruña, Inés Rey, afirmou que iniciativas como o CEI ou a AESIA son "o carburante que nos axuda a seguir avanzando" para consolidar a cidade como "unha cidade de vangarda".

Futuro e consolidación do 'hub' audiovisual

O proxecto da Cidade das TIC non se detén. Para 2026 prevese reforzar este polo audiovisual coa apertura de dous novos platós tradicionais de 2.000 e 2.500 metros cadrados, o que ampliará a capacidade operativa do complexo. Esta expansión consolidará a contorna como un auténtico 'hub audiovisual' de referencia no noroeste peninsular.

González Formoso subliñou que o plató permite "facilitar un sector que quere soñar, que quere dar oportunidades aos creadores galegos e galegas de poder expoñer ese traballo no mundo". Con este balance, o CEI consolídase como un espazo clave para a produción virtual aplicada ao cinema, a moda ou a publicidade, proxectando o talento audiovisual galego a nivel nacional e internacional.