O PSdeG-PSOE de Lugo, a través do secretario de Educación provincial, Carlos Ferreiro, esíxelle á Xunta que explique “de forma inmediata e clara” cales son “as súas intencións con respecto aos comedores escolares e se ten previsto convertelos nunha oficina de recadación”. Os socialistas reclaman unha resposta despois da preocupación que lles transmiten varios representantes da comunidade educativa polos “movementos” realizados polo Goberno autonómico nas últimas semanas. O PSdeG lucense critica os “inaceptables movementos e reiteradas manifestacións de responsables da Consellería de Educación” en diferentes ámbitos, nas que os populares expresan a súa disconformidade coas actuáis tarifas e a intención de incrementar os prezos dos servizos de comedor dos centros públicos. “Esperamos que a Xunta dea unha resposta urxente e negue estas informacións porque sería inaceptable que, unha vez máis, o fin da austeridade xustifique todos os medios”, afirma Carlos Ferreiro. Os prezos incrementaríanse non só para os alumnos senón tamén para o profesorado, chegando a un custo de ata o dobre do que pagan actualmente, segundo as intencións mostradas pola Xunta.