Un total de 365 veciños e veciñas de Bogo, na Pontenova, recibirán o próximo martes, día 8, os títulos de propiedade das fincas resultantes do proceso de concentración parcelaria. A Consellería do Medio Rural culmina así un proceso no que investiu máis de 3,2 millóns de euros en diversas actuacións, entre as que figura a creación dunha rede de camiños de 64 quilómetros de extensión. A concentración parcelaria posibilitou a reorganización de 2.088 hectáreas de superficie, nas que había 9.784 parcelas que quedaron reducidas a 1.245 fincas, pasándose deste modo dunha superficie media inicial de 2.114 metros cadrados por parcela a unha superficie media de 16.771 metros cadrados. En consecuencia, viuse tamén reducido o número de fincas por titular, sendo agora a media de 3,41 fronte ás 27,95 parcelas anteriores ao proceso. O principal uso destes terreos é o aproveitamento forestal, aínda que tamén hai terras dedicadas a labradío e prado. Ao respecto, a delegada territorial da Xunta, Raquel Arias, destacou que “tras esta última agrupación parcelaria A Pontenova ten resolta a concentración no 80% da superficie total do concello”. A delegada subliñou que a Consellería do Medio Rural está a axilizar os procedementos de concentración abertos, “que posibilitan un incremento da produción agraria e unha mellor ordenación da terra en función dos usos”, xunto cunha aposta polas figuras de reestruturación parcelaria que incorpora a nova Lei de mellora da estrutura territorial agraria de Galicia. Neste sentido, indicou que estes procesos “incrementan a rendibilidade económica e social, revalorizan as fincas concentradas, facilitan o acceso aos seus propietarios e serven de impulso para a implantación de novas explotacións e proxectos de carácter empresarial no ámbito rural”. A entrega de títulos en Bogo realizarase na escola de Vilarxubín a partir das 9,30 horas da mañá. Os beneficiarios deben identificarse co seu Documento Nacional de Identidade ou enviar en representación súa a persoas autorizadas que presenten a pertinente autorización e copia do DNI do titular representado. No caso de propietarios que faleceran, poderán recoller os títulos os seus herdeiros, presentando documentación acreditativa de tal circunstancia.