Nos últimos días a Xunta de Galicia vén de confirmar a intención da Consellería de Sanidade de impulsar a xestión integrada na provincia de Lugo ao obxecto de coordinar as tres áreas sanitarias actualmente existentes: A Mariña (Cervo-Burela), Centro e Sur (Monforte). A devandita decisión vén de xerar certa polémica por canto hai quen asegura que este novo modelo de coordinación prexudicaría aos hospitais de Burela e de Monforte e incluso podería dar lugar á perda de determinadas unidades, servizos ou consultas nestes centros hospitalarios. Pola contra desde o Sergas está a subliñarse que o modelo de xestión integrada pretende potenciar a coordinación entre os diferentes niveis asistenciais –o que reforzaría as competencias dos actuais xerentes executivos destas áreas- mantendo o mesmo mapa sanitario, garantindo unha mellor prestación médica e incluso abrindo a porta a contar con novos servizos o que evitaría desprazamentos ata o HULA. No caso concreto do Hospital da Costa existe, ademais, o compromiso ratificado polo Presidente da Xunta, de impulsar o proxecto construtivo de ampliación deste centro hospitalario coa intención de melloralo e dar resposta as novas necesidades asistencias dos veciños desta comarca, logo de 27 anos de funcionamento deste hospital. Polo exposto con anterioridade, o Grupo Parlamentario Popular, presenta a seguinte proposición non de lei en Comisión. “O Parlamento de Galicia, insta á Xunta de Galicia, a: 1. Garantir a continuidade dos servizos, unidades e consultas existentes no Hospital da Costa de Burela e incluso desenvolver cantas xestións e esforzos sexan necesarios para incrementalos e potenciar a súa calidade asistencial. 2. Manter o actual mapa sanitario do Sistema Público de Saúde na provincia de Lugo de tal xeito que se manteña a área sanitaria da Mariña (Cervo-Burela) e incluso reforzala de tal xeito que o xerente executivo desta área teña baixo a súa responsabilidade non só o centro hospitalario senón tamén os centros de atención primaria da área. 3. Levar adiante de inmediato a ampliación do Hospital da Costa, co fin de adaptalo á actual demanda asistencial, á mellor prestación para os pacientes e á realización do traballo dos profesionais con seguridade e calidade”.