A delegada territorial da Xunta, Raquel Arias, destacou a incorporación dun novo produto turístico, o Turismo mariñeiro, que ven a sumarse a ampla oferta de experiencias turísticas a través das que a Xunta de Galicia promociona a Mariña lucense como xeodestino. Na presentación deste produto, Arias destacou o seu “carácter innovador e integrador de numerosas experiencias”, xa que permite disfrutar das praias e a gastronomía local, pero achegándose ao mesmo tempo aos oficios relacionados co mar, como o labor das redeiras ou a construción de barcos. A delegada indicou que “para alcanzar a excelencia no turismo é preciso innovar, como neste caso, introducindo no mercado novos produtos e servizos”. Paralelamente, engadiu, “deben desenvolverse novas formas de venda, e nesta liña traballa Turismo de Galicia, deseñando paquetes temáticos baseados en xeodestinos, isto é, ofrecendo ao turista experiencias únicas en espazos singulares da nosa comunidade”. Neste produto, colabora tamén a Consellería do Medio Rural e do Mar, xunto co Grupo de Acción Costeira A Mariña-Ortegal. Ao respecto, explicou que o Turismo Mariñeiro “é un dos des produtos cabeceira de marca elaborados a partir dos recursos existentes en Galicia”. Polo que respecta á Mariña, incidiu, “figura tamén dentro do produto Faros e praias salvaxes, sen esquecer a promoción do Camiño do Norte ou dos espazos naturais que están dentro do produto Bosques de Galicia na Mariña”. Igualmente, destaca a aposta polas rutas da artesanía, en colaboración coa Mancomunidade de Municipios da Mariña. Arias lembrou que o turismo xera unha actividade económica en Galicia que ascende a 6.138 millóns de euros, o que representa o 10,6% do noso produto interior bruto. “É un peso importante –aseverou- pero dende a Xunta de Galicia cremos que aínda queda moito potencial por explorar  e por iso continuamos traballando, xunto cos axentes implicados e as demais administracións, para aumentar a nosa presenza no mercado turístico nacional e internacional”.