Nestes días varios operarios do Concello estiveron traballando na mellora destas instalacións, executando traballos de preparación do campo como a corta do céspede ou o pintado das liñas delimitación das áreas. Ao mesmo tempo tamén se dotou de redes ás porterías. Uns traballos que xa remataron e que deron lugar a un terreo de xogo completamente preparado para a súa utilización por parte dos deportistas. Esta actuación fora solicitada por un grupo de persoas afeccionadas que se amosaron interesadas en empregar estas instalacións. Deste xeito, e unha vez acondicionado o campo, a delegación de Deportes anima a todos os afeccionados ao fútbol 7 “a darlle uso a este equipamento” co único requisito de “solicitar un permiso no Concello previo á súa utilización”. Guillén asegura que o Concello traballará para manter o campo en boas condicións que permitan aos deportistas “seguir xogando nunhas instalacións axeitadas a esta práctica”. Unha iniciativa que se enmarca nun conxunto máis amplo de medidas para o mantemento das instalacións deportivas de Río Covo, especialmente de cara á chegada do verán.