MONDOÑEDO
Abarrote na catedral para o primeiro concerto do Festival MindoMúsica
O templo quedouse pequeno para o público que se achegou a gozar da música de cámara
Este venres, nova cita no auditorio municipal Pascual Veiga ás 20:30 horas con entrada libre
COPE de la Costa
Tiempo de lectura: 1'
Actualizado 11:56
A catedral de Mondoñedo quedouse pequena para o primeiro concerto do Festival MindoMúsica, que se celebrou este xoves cunha notable presenza de público.
Nesta ocasión, os intérpretes -Rebeca Maseda e Antonio Viñuales ao violín, Alberto Rodríguez á viola, Iván Siso ao violoncello, e Yolanda Fernández ao clarinete - tocaron obras de Wolfgang Amadeus Mozart, Anton Webern e Joaquín Turina, ademáis de varias pezas conservadas no Arquivo de Música da Catedral de Mondoñedo. O concerto levou por título "Unha viaxe de ida e volta".
Ata a alcaldesa mindoniense, Elena Candia, agradeceu públicamente a través das redes sociais o compromiso e a boa resposta dos responsables do festival na persoa da súa directora artística, Rebeca Maseda. "Un luxo; moitas grazas por permitirnos escoitarvos", sinalou Candia.
Nova cita este venres
Aos músicos anteriormente citados, súmase na tarde deste venres a excepcional pianista compostelá Rosalía Gómez, gañadora de numerosos premios internacionais. Neste segundo concerto tocarán obras de Andrés Gaos, Robert Schumann e Serguéi Prokófiev baixo o epígrafe "Xenialidades varias". A cita, ás 20:30 horas no auditorio municipal Pascual Veiga, con entrada libre ata completar aforo.
Función didáctica e divulgativa
Ademáis dos concertos, o Festival MindoMúsica tamén inclúe unha parte didáctica e divulgativa. Os músicos participaron o martes nun ensaio aberto cos rapaces da Escola Municipal de Música "O Pallarego" de Mondoñedo, cos que puideron falar sobre as particularidades dos seus instrumentos.
O mércores, fixeron o mesmo a través dun faladoiro público no que trataron asuntos relacionados coa vida profesional dun músico: recoñecemento social e retribución económica en España e Europa, vías de formación (escolas, conservatorios, formación a distancia...), diferentes itinerarios relacionados coa ensinanza e coa interpretación, etc.
Tamén aproveitaron para ofrecer un adianto do concerto deste venres. No vídeo, podemos gozar da Obertura sobre temas Hebreos, Op. 34, de Serguéi Prokófiev.
Contenidos relacionados
- item no encontrado