Os socialistas de Cervo amosan a súa satisfacción ó coñecer a noticia de que este ano o Día do Xubilado se volve a celebrar no municipio, “agradecemos que o equipo de goberno tivera en conta a proposta socialista do ano pasado, pois considerábamos un gasto excesivo desprazar a tódolos participantes a un concello veciño e unha pena que os beneficios que esta festa pode ofrecer á hostelería e comercio local fosen para outros”. Este ano a celebración volverá a ter lugar nunha carpa instalada na Praza dos Campos de San Ciprián, os membros do Grupo Municipal Socialista subliñan que “o goberno cervense rectificou o seu erro e con esta decisión amosan que hai un ano non nos quixeron dar a razón”. Afirman que “este día suporá un esforzo presupostario moi grande para as arcas municipais tendo en conta a situación económica que atravesamos, de facer este esforzo que os beneficios recaian no noso concello. Hai que pensar que esta festa repercute moito na economía local, o comercio e a hostelería, pola que o goberno parecía esquecerse o pasado ano”. Dende o PSOE de Cervo confirman a súa asistencia ós actos e aseguran que “sabemos que moitos veciños estarán de acordo en privarse de gastos innecesarios e que prefiren quedar no concello e dar vida e actividade ó noso pobo. Porque o que realmente é importante é facer unha homenaxe ós xubilados e que a xente disfrute dun día en compañía dos seus maiores”.