O rexedor alude á polémica suscitada nos últimos días coa celebración da regata Transgascogne. Suárez Barcia subliña que “desde o Concello e ACISA estamos conseguindo difundir a milleiros de persoas os encantos de Ribadeo, estamos tirando para adiante coa Xunta ou sen Xunta”. O rexedor non entende como en edicións anteriores se destinaron 40.000 euros á Transgascogne desde a Xunta e agora “se lle da esta patadiña ao Club Náutico”. Fernando Suárez dixo que “durante dúas edicións anteriores aos responsables da Xunta, que eran os mesmos que agora, enchéuselles a boca do importante que era para Ribadeo e asumiron integramente os custos duns 40.000 euros en cada edición, incluso ao meu xuízo quizais un pouco elevado porque se podía facer sen dúbida por un pouco menos”. O alcalde ribadense pensa que “hai que retratar á xente tal como é hai que e dicir que da palabra do PP calquera se fía. Hai pouco tempo confirmaban para este ano o seu apoio a este evento e agora a pesar de que por primeira vez tanto o Concello, máis modestamente, como a Deputación, un pouquiño máis, apoiaban o mesmo a Xunta decidiu dicir que non. Eu non sei se é que agora politicamente non interesaba e antes si”. Suárez Barcia sinalou que “en todo caso para Ribadeo, pola situación económica que temos a día de hoxe, estamos volcados en novos mercados turísticos para abrirnos ao mundo, consideramos moi importante a difusión turística que se faga do noso concello por aí. E estámolo a facer desde o Concello coa Xunta, desgraciadamente máis sen ela a xulgar polo nulo apoio que están tendo como nestas cousas, como na praia das Catedrais, etcétera”.