A portavoz do Partido Popular de Mondoñedo, Elena Candia, pídelle ao rexedor local, o nacionalista Orlando González, que dea explicacións das xestións feitas ata o momento no relativo a posta en marcha do novo Plan de Emerxencias no que, segundo quedou deseñado no Protocolo Xeral firmado entre a Xunta e as Deputacións, as Deputacións colaborarán coa Xunta e cos gobernos municipais na posta en marcha dun Plan Integral de Asistencia ás Emerxencias. En relación a isto, Elena Candia, esíxelle ao rexedor local que rectifique nas súas declaracións nas que a achaca de mentir, xa que a reestruturación do Plan de Emerxencias non vén imposto por ningún partido político. A popular explica que o funcionamento dos novos parques de bombeiros, un servizo que o Grupo Popular agradece, conleva cambios no mapa de emerxencias. Así, puntualiza a popular que neste proceso de reestruturación colaboran tanto as Deputacións, como os gobernos municipais e a Xunta de Galicia. A portavoz popular asegura que un rexedor municipal debe ser quen de dar resposta e cumprir coas súas responsabilidade, involucrándose na defensa dos mindoniense. Deste xeito, a moción rexistrada polo Grupo Municipal Popular procura a involucración do equipo de goberno local co obxecto de adiantarse e tentar traballar para que neste proceso de reestruturación Mondoñedo non se vexa afectado. A popular explica que a moción do PP é unha proposta de traballo a seguir que o rexedor local pode aceptar ou non, pero independentemente disto Orlando González non se debe esquecer as súas responsabilidades, asumindo as súas funcións de goberno. Ante isto, Candia pídelle que defenda a súa xestión e que dea conta das actuacións acometidas neste senso, no caso de existir. Elena Candia asegura que o seu PP local está a traballar e colaborar para acadar proxectos para Mondoñedo, como foi o caso do obradoiro de emprego. Porén, a voceira explica que este traballo non suple ao que debe emprender un rexedor local, polo que lle pide que non esqueza o seu acometido e dea conta das súas xestións.