O deputado socialista no Congreso José Blanco vén de presentar un conxunto de preguntas parlamentarias ao Goberno para que responda sobre a situación que atravesa o gasoduto da Mariña. Blanco demanda ao Goberno que informe sobre o estado de tramitación desta infraestrutura, sobre os motivos polos que se atopa “paralizada” no Ministerio de Industria e cando prevé o Goberno desbloquear esta infraestrutura para que poidan comezar as obras de execución da mesma. No seu escrito, o deputado socialista lembra que o pasado 9 de outubro, en resposta a unha pregunta previa do propio Blanco, o Ministerio de Industria, Enerxía e Turismo asegurou que “tras unha análise rigorosa das diferentes alternativas de trazado propostas, realizada seguindo criterios de seguridade, afección ambiental, racionalidade do trazado ou minimización das afeccións, entre outros, se decidiu manter o trazado inicialmente previsto no proxecto polo promotor”. Para Blanco, sendo esta a situación descrita polo Ministerio, “facíase lóxico pensar que o proxecto tiña o camiño despexado para a súa execución”. “Non obstante, nunha recente reunión de alcaldes da Mariña lucense con responsables de Alcoa poñíase en evidencia que a tramitación desta infraestrutura está parada no Ministerio de Industria dende o pasado mes de novembro, cando o Ministerio de Medio aprobou o informe de impacto ambiental”. Segundo o deputado socialista “esta parálise é insostible” dado que non só impide a Alcoa o acceso a “unha fonte de enerxía máis barata e máis respectuosa co medio” como é o gas natural, senón que impide tamén que dela “se beneficien o resto de empresas da bisbarra da Mariña e os cidadáns nos seus fogares”. Blanco lembra ademáis que Alcoa xera 2.000 postos de traballo directos e outros mil indirectos, dous terzos dos cales se concentran na fábrica radicada na localidade lucense de San Cibrao. Por todo iso, o deputado socialista demanda explicacións ao Goberno e inquire sobre cando se vai superar a situación de parálise para poder iniciar as obras