Desde o equipo de goberno manifestan que “non existe risco algún, nin patrimonial, nin paisaxístico nin para a saúde pública, en contra do que afirma o BNG, ao que por certo non o vimos nin oímos protestar nin denunciar nada cando se produciron situacións similares durante o goberno bipartito local”. O goberno local confía en que o venres esta situación quede totalmente amañada, rematada a limpeza de colectores, e retirados na súa totalidade os depósitos da zona de O Berbés. Así mesmo, indican que nas próximas semanas se farán públicas as medidas a adoptar para tentar evitar situación coma as que se deron coas treboadas recentes, que causaron asolagamentos. E aseguran: “de feito os veciños directamente afectados son coñecedores de boa parte destas medidas, porque se falou con eles para coñecer de primeira man os danos sufridos e tamén a súa visión sobre as causas das situacións que se deron”. Finalmente, pídenlle ao BNG “seriedade, cordura, e que non se deixen levar pola tentación de enganar aos cidadáns propagando informacións que non son veraces”.