Foz acollerá mañá, martes, un acto público en recordo das vítimas da violencia de xénero. Está convocado para as 12:30 horas diante da Casa do Concello e contará coas intervencións do subdelegado do Goberno en Lugo, Ramón Carballo Páez, e do alcalde focense, Javier Jorge Castiñeira. Tamén asistirán outros membros da corporación municipal. O Concello invita a todos os veciños a participar neste acto no que se homenaxeará as vítimas da violencia de xénero, especialmente á veciña de Foz Elena Rodríguez, falecida neste pasado mes de abril na súa casa do barrio de Malates.