O centro de día de Ribadeo incorporouse no ano 2008 á rede de centros de atención a persoas maiores do Consorcio Galego de Servizos de Igualdade e Benestar, que destina anualmente arredor de 250.000 euros ao seu funcionamento. Para a realización das obras, que foron financiadas pola Obra Social de La Caixa, o Consorcio colaborou co Concello de Ribadeo no estudo das posibles opcións. Agora, unha vez instalados os novos baños, estanse analizando melloras no sistema de calor. Os centros de día do Consorcio Galego de Servizos de Igualdade e Benestar veñen definidos como centros xerontolóxicos de alcance social e terapéutico e de apoio ás familias, que prestan atención diurna ás persoas maiores con dependencia ou en grave risco de padecela, promovendo a súa autonomía persoal, a actividade relacional e a permanencia no entorno habitual.