Hoxe realizáronse en Burela as probas de selección das catro persoas que ocuparán as prazas de coidadores dos comedores escolares ata finais de curso. Ás mesmas presentáronse trinta candidatos/as, segundo os datos facilitados esta mañá pola concelleira de Educación, Mónica Pedre. A edil popular anunciou que “a súa incorporación será inmediata” e subliñou que “o número de coidadores escolares pagados íntegramente polo Concello é de nove”. A isto hai que engadir a aportación que fai o Concello burelés ás actividades extraescolares para que os colexios estean abertos polas tardes e os nenos e nenas de Burela poidan disfrutar de obradoiros de carácter medioambiental, entre outros. Mónica Pedre dixo que “isto lles supón un aforro importante ás familias de Burela e demostra o compromiso do equipo de goberno cos servizos sociais en xeral e coa educación en particular”. Nos vindeiros días tamén se realizará a selección de persoal para cubrir o posto de monitor/a da aula CeMIT de Burela. A aportación da xunta para realizar esta contratación ascende a algo máis de 18.000 euros.