O concelleiro de Medio Ambiente de Ribadeo, Horacio Cupeiro, foi o encargado de recoller as bandeiras azuis que lucirán as praias de As Catedrais e As Illas-Castros o vindeiro verán. Tamén recibiu o galardón de sendeiro azul o paseo do faro da Illa Pancha ás Aceas. Ata Vigo se desprazou tamén un directivo do Real Club Náutico de Ribadeo, para recoller a bandeira azul do porto deportivo. O alcalde de Barreiros, Alfonso Fuente, recolleu en Vigo as seis bandeiras azuis que lles concedeu Adeac a outros tantos areais do municipio neste 2014. Son as praias de: As Pasadas, Lóngara, Coto, Acantilado-Remior, Altar e Fontela-Valea. A entrega realizouna o presidente da Xunta, Alberto Núñez Feijoo, que estivo acompañado polo conselleiro de Medio Ambiente, Territorio e Infraestruturas, Agustín Hernández. O alcalde de Foz, Javier Castiñeira, viaxou ata Vigo para recoller as bandeiras azuis que lle concedeu Adeac aos areais focenses hai uns días. O presidente da Xunta, Alberto Núñez Feijoo, foi o encargado de entregar os galardóns. En Foz lucirán bandeiras azuis neste 2014 as praias de Areoura, Peizás, Arealonga, Llas e A Rapadoira. E o paseo das praias recibiu o distintivo de sendeiro azul. O alcalde de Burela, José Mª González Barcia, desprazouse este venres a Vigo para recoller as bandeiras azuis que recibiron os areais do municipio neste 2014. As praias de O Portelo, A Marosa e Ril lucirán estes distintivos o vindeiro verán. Tamén recibiron estes galardóns o barco museo Reina del Carmen e a aula de educación medio ambiental Gaia. Ademais o paseo das praias foi recoñedido coma sendeiro azul. O acto de entrega estivo presidido polo titular do executivo galego, Alberto Núñez Feijoo, e polo conselleiro de Medio Ambiente, Agustín Hernández.