O Partido Popular de Mondoñedo advirte ao equipo de goberno local dunha necesaria revisión da instalación da rede municipal de abastecemento de auga, tralos problemas que se están a producir en varias parroquias do municipio. Os populares explican que a pasada semana veciños do barrio de Moural, en Santa María Maior, non dispoñían dun servizo óptimo de auga, xa que chegaba as casas cun aspecto escurecido. Pese a que a empresa de mantemento deu resposta con axilidade a incidencia, a agua segue a saír turbia. Esta situación, segundo aseguran os populares, dificulta o día a día dos veciños, sobre todo daqueles que non dispoñen dunha fonte propia que permita a súa utilización mentres non se solvente definitivamente os problemas na traída de auga municipal. O Partido Popular lembra que esta non é a única parroquia que sufre problemas coa traída de auga municipal.  Os populares denunciaron en varias ocasións o servizo deficiente que ofrece o concello en Masma, xa que ademais de sufrir a carencia deste servizo durante os meses de verán e de seca, durante o inverno ou días de choiva a auga chega as billas particulares con lodo. Dende o Partido Popular tamén aseguran que existen outros barrios que manifestaron incidencias no abastecemento de auga, polo que estudarán estas demandas e pedirán as actuacións oportunas para darlles solucións. Deste xeito, os populares perciben que as incidencias que se están a dar poñen de manifesto a necesidade de levar a cabo unha revisión na instalación da traída de auga municipal que abastece a varias parroquias.