COPE.es

A Conta Xeral é un acto esencial de fiscalización da contabilidade local pública por parte do Tribunal de Contas e do Consello de Contas de Galiza. A conta xeral pon de manifesto a xestión realizada polo goberno local nos aspectos económico, financeiro, patrimonial e orzamentario e é un instrumento básico que permite á Corporación e aos veciños coñecer que se fixo durante o exercicio orzamentario, a onde foron a parar os cartos públicos, o estado das contas e en definitiva é un mecanismo de control da xestión do grupo de goberno.

A valoración do BNG sobre a Conta Xeral do ano 2008 é preocupante en varios aspectos que indican que a xestión do goberno municipal deixa moito que desexar. Esto é o que se extrae do informe dos servizos de intervención do Concello que acompaña á Conta Xeral.

En primeiro lugar, o resultado orzamentario é negativo en -23.959 €. Esto xa se ven arrastrando dos últimos anos (2004: 380.874,48 €, 2005: 877.487,26 €, 2006: 4.436141,12 €, 2007: -437.336 €, 2008: 212.174 €) e pon de manifesto a escasa capacidade do Concello para xerar un remanente que permita ter a posibilidade de afrontar un maior gasto de inversión e de mellora de servizos.

No mesmo sentido o aforro neto no ano 2008 é un 0,83, é dicir, case non se aforra, o que limita ao Concello nas súas posibilidades de facer novos gastos de inversión con recursos propios ou a ampliación de novos servizos.

Así mesmo, o remanente de tesourería para gastos xerais é de 2.060.740,30 € pero hai que dicir que foi diminuíndo constantemente ano tras ano o que limita a capacidade do Concello para realizar gastos non previstos e para o financiamento de expedientes de crédito extraordinario ou suplementos de crédito, así como para a incorporación de remanentes de exercicios anteriores.

A esto habería que engadir o importe dos dereitos pendentes de cobrar de exercicios pechados que son de 2.201.274,39 € e que xa dificilmente se cobrarán porque o procedemento administrativo de recadación en vía de contrinximento non se leva ata as súas fases finais, como esixe a lexislación tributaria e que debería rematar cos correspondentes embargos se fose preciso. Está claro que ao grupo de goberno non é o suficientemente dilixente para cobrar ás débedas de máis de 2 millóns de euros e dálle a razón ao BNG cando criticaba que os orzamentos destes anos estaban inchados ao incluír como ingresos ditas débedas que nunca se cobraran e que acabaran prescribindo.

De todos estes datos pódemos afirmar que a xestión do goberno municipal foi mala e que a consecuencia desta mala xestión o concello estase quedando sen recursos para mellorar, manter ou crear novos servizos así como para facer as inversións que se necesitan. A raíz disto, o Concello non é capaz de xerar aforro debendo consumir o remanente conseguido en anos anteriores. Esto estaría xustificado se dito gasto estivera centrado en inversións públicas, en crear máis servizos ou en mellorar a calidade de vida dos veciños. Pero esto non é así, e existen gastos que supoñen un despilfarro pola falta de control sobre os mesmos, en moitos casos pola falta de dirección e de coordinación dentro do grupo de goberno. 

Observando os datos da Conta Xeral podemos sacar a conclusión –que todo o mundo xa sabe- de que as arcas municipais con este goberno sobreviven exclusivamente das rendas que deixaron as licenzas do ano 2005 e 2006, froito do descontrol no outorgamento de licenzas urbanísticas, pero que se seguimos coas mesmas políticas acabarase por endebedar cada vez máis ao Concello.

Para o BNG é necesario un cambio radical das políticas de xestión, deixando de dilapidar os fondos públicos progresivamente, gastando onde verdadeiramente se necesite (gasto público e de servizos sociais) e tomando medidas de control dos gastos que redunden nun maior aforro.