Sen entrar a valorar a eficiencia do sistema en canto á rendabilidade económica ou á súa hixiene, o actual sistema de recollida de lixo implantado no Concello de Foz polo Grupo de Goberno non cumpre, desde o punto de vista preventivo, coa Lei de Prevención de Riscos Laborais nin co Real Decreto 487/1997 de 14 de abril, en canto que a primeira medida que debe tratar de implantar o empresario -neste caso, o Concello de Foz- é evitar a manipulación manual das cargas, mediante a automatización dos procesos ou o uso de axudas mecánicas. É evidente que este sistema podería ser cambiado por outro que contemplase a automatización dos procesos ou o emprego de equipos mecánicos.

Tampouco cumpre o Concello coas prescripción do RD en canto as disposicións mínimas de seguridade e saúde relativas á manipulación manual de cargas que entrañe riscos, en particular dorsolumbares, para os traballadores. A modo de indicación xeral, o peso máximo que se recomenda non exceder (en condicións ideais de manipulación) é de 25 kg. Así mesmo, se a poboación exposta son mulleres, traballadores novos ou maiores, ou se se quere protexer á maioría da poboación, non se deberían manexar cargas superiores a 15 kg. En ocasións e cos contenedores cheos o peso que deben cargar os traballadores sobrepasan os 25 kg. e poden chegar aos 50 kg. En moitas ocasións é só un operario o que realiza todas as funcións do servizo, conducindo, repartindo e recollendo os cubos da barredura.

Pero quizais o risco máis evidente e máis grave que conleva este sistema -tanto na repartición dos cubos como no servizo de recollida- ven dado por realizarse todo manualmente e subidos a unha plataforma remolcada por un vehículo sen as mínimas medidas de seguridade. En caso de freada brusca do camión ou de choque, as consecuencias para os traballadores subidos ao remolque -sen ningunha medida de

seguridade- poderían ser moi graves e incluso mortais.

Tampouco o sistema cumpre as especificacións en canto a equipos de traballo e as pezas de seguridade correspondentes que prevesen ou paliasen as consecuencias no caso de accidentes de traballo. Así mesmo o actual sistema non cumpre coas normas establecidas no Código de Circulación en canto ao transporte de mercancías ou cousas nin por suposto coas medidas de seguridade respecto aos

traballadores/as que van situados no remolque.

Por todos estes motivos o BNG presenta unha moción para aprobar en pleno no que insta ao Grupo de Goberno a cambiar o sistema de recollida de lixo actual por outro sistema máis automatizado no tempo máis curto posible e sen que exceda do mes desde a aprobación do acordo e así mesmo que o Concello de Foz cumpra e faga cumprir a lei en canto a prevención de riscos laborais con respecto aos seus traballadores/as así como todas as medidas necesarias para preservar a súa seguridade e hixiene.

Para o BNG é imprescindible que as administracións públicas dean exemplo en canto a cumprimento da lei e máis neste caso porque se pon en risco a saúde e a vida das persoas que traballan na recollida de lixo.